Më 10 shkurt, qytetarët e Kosovës janë ftuar t’i bashkohen një bojkoti mbarëkombëtar të marketeve, si reagim ndaj rritjes së vazhdueshme të çmimeve të produkteve ushqimore dhe esenciale, duke iu bashkuar nismës rajonale që filloi në Kroaci.
Ky veprim i koordinuar është organizuar nga grupi “Kosova Bojkoton”, i cili tashmë numëron rreth 4 mijë anëtarë në rrjetet sociale. Sipas organizatorëve, bojkoti do të konsistojë në ndalimin e blerjeve për një ditë, si mesazh i fuqishëm ndaj tregtarëve dhe autoriteteve se konsumatorët nuk do të pranojnë më çmime të padrejta dhe abuzive.
Në Kosovë, çmimet janë rritur ndjeshëm gjatë katër viteve të fundit, veçanërisht për produktet bazë dhe ato esenciale, duke rënduar buxhetin e familjeve të zakonshm, ndërsa pagat kanë mbetur pothuajse të pandryshuara, duke ulur fuqinë blerëse të qytetarëve.
Mundesh me e lexu edhe…
Norma e inflacionit në Kosovë për vitin 2024 ishte 1.6 per qind, pro vitet paraprake u rrit ndjeshëm ku ne 2023 ishte 4.94%, ndërsa në vitin 2022 ishte 11.58%.
Grupi “Kosova Bojkoton” ka bërë thirrje për solidaritet të gjerë, duke theksuar se një bojkot i suksesshëm mund të detyrojë uljen e çmimeve dhe të sjellë më shumë drejtësi në treg.
“Nuk do të pranojmë të paguajmë më shumë se që duhet. Nuk ka nevojë të protestojmë në rrugë, vetëm do t’i bojkotojmë marketet deri në produkte minimale si uji apo detergjenti. Gjithçka tjetër BOJKOT deri në ulje të çmimeve,” thuhet në një nga njoftimet e grupit.
Nismës i është bashkuar edhe grupi “Network Prishtina” me 65,000 anëtarët e tij.
Bojkoti është organizuar të mbahet një ditë pas zgjedhjeve në Kosovë dhe, sipas organizatorëve, nuk ka për qëllim të dëmtojë bizneset lokale, por të nxisë një sistem ekonomik më të drejtë dhe të qëndrueshëm për të gjithë.
Lëvizja filloi në Kroaci nga iniciativa “Përshëndetje Inspektor”, ku dy bojkote tërëditore shkaktuan humbje prej 38 milionë eurosh në javën e parë dhe 42 milionë në të dytën. Administrata tatimore kroate raportoi se numri i faturave me pakicë në ditën e parë të bojkotit ra me 44% krahasuar me një javë më parë, ndërsa vlera totale e faturave u ul me 53%, duke e bërë bojkotin të suksesshëm. Si rezultat, qeveria kroate shtoi 40 artikuj të rinj në listën e produkteve me çmime të kufizuara për të lehtësuar presionin e inflacionit.
Ky bojkot u përhap në rajon, përfshirë Bosnjën dhe Hercegovinën, Maqedoninë e Veriut, Malin e Zi, Serbinë dhe Slloveninë. Në Shqipëri, thirrja për bojkotimin e marketeve ka nisur së fundmi dhe pritet të zgjasë nga 5 deri më 10 shkurt./Katror.info
Përgatiti:
