Njihuni me Mërgimin, pingpongistin dhe trajnerin 31 vjeçar që jeton në Finlandë, i cili edhe pse vepron jashtë atdheut ka ushqyer një lidhje të pathyeshme me të.
“Unë jam Mërgim Kelmendi, 31 vjeçar. Banoj në Finlandë që 24 vjet. Kam shku si një 7 vjeçar. Pingpongut ia kam nis në vitin 2006; tash 17 vite. Trajner pingpongu jam që 5 vite. Ushtroj me fëmijë dhe që 1 vit e pak jam edhe udhëheqës i klubit në Finlandë,” rrëfen Mërgimi në një intervistë për Katror Media.
E ani pse ka më shumë vite të jetuara në mërgatë, Mërgimi lidhjen me Kosovën dhe pasionin e tij për pingpongun i ka ndërlidhur përmes një përpjekjeje unike që vullnetarizmi ia shpalos në formën e një akti të thjeshtë, por me ndikim.
Mundesh me e lexu edhe…
Ai ka vendosur që të përkrahë pingpongistët e Kosovës, duke iu dhuru atyre reketa pingpongu, por edhe goma rekete; elemente këto thelbësore, por bukur të kushtueshme për këtë sport, e që u mundësojnë sportistëve të krijojnë ritmin e tyre në tavolinë dhe të performojnë më mirë.
“Kemi folur me Kastriotin (Orana) dhe me ka kallxu që kanë nevojë për reketa dhe për goma. Unë ia kam nisë me i mbledhë dhe i kam pru këtu në Kosovë.”
Kjo nuk është hera e parë në të cilën Mërgimi ka ndihmu klubin, shprehet kryetari i klubit të pingpongut PriPing, Kastriot Orana.
“Këtu jemi në klubin e pingpongut PriPing, ku e kemi pranu një donacion prej Mërgim Kelmendit, i cili është një mërgimtar në Finlandë. Mërgimi është pingpongist dhe trajner i pingpongut. Me iniciativën e tij dhe bashkë-lojtarëve të klubit të tij, herën e parë kanë mbledhur pajisje të pingpongut; reketa dhe goma nëpër klube të ndryshme, ndërsa kjo është hera e dytë që Mërgimi po na sjellë pajisje të pingpongut; fleta/goma të pingpongut.”
Një donacioni prej 40 gomash reketi nuk po ua shohin hajrin vetëm sportistët e PriPing, por edhe pingpongistët e klubeve të tjera, meqë, sipas Oranës, klubi i tij ka vendosur që këtë donacion ta ndajë edhe me klubet e tjera.
“Ne kemi vendosur si klub që këtë donacion ta shpërndajmë me klube të tjera. E kemi një grup në Viber me të gjithë delegatët e klubeve të Kosovës, ku jemi rreth 44 klube të pingpongut. Ne i njoftuam ata që kemi pranuar këtë donacion dhe kemi shprehur dëshirën që këtë donacion me e nda me klubet e tjera të pingpongut në Kosovë.”
Rëndësinë e këtij donacioni ai e sqaron duke theksuar se jo të gjithë sportistët kanë mundësinë t’i ndërrojnë gomat e reketit aq sa ju nevojitet, në veçanti ata të cilët janë më të avancuar në këtë sport.
Sipas tij, një iniciativë e tillë i motivon lojtarët dhe u mundëson atyre që të performojnë më mirë, falë gomave më shpejtësi dhe rrotullime të ndryshme.
“Reketat e pingpongut përbëhen prej dërrasës dhe gomave. Gomat e pingpongut janë si gomat e veturës. Pra, me kalimin e kohës konsumohen – është material shpenzues. Kështu që, ky donacion ju ndihmon lojtarëve që nuk i kanë kushtet me i ble gomat, ose që dojnë me i pasë pak ma të reja, e të cilat i motivojnë ma shumë për me lujtë. Kështu që, kjo e ka një benefit të dyanshëm: neve si klub na lehtëson financiarisht që mos me pasë nevojë me i ble, ndërsa lojtarëve u jep një motiv shtesë.”
I pyetur për sfidat dhe vështirësitë e kësaj iniciative, me një thjeshtësi të jashtëzakonshme, Mërgimi shpjegon se e gjithë kjo iniciativë nuk i ka kushtuar aspak dhe se brenda një periudhe shumë të shkurtër ai ka arritur që të mbledhë 40 goma rekete.
Këtë ai e ka arritur duke ua shpjegu iniciativën e tij kolegëve në Finlandë, dhe duke kërku nga ta që gomat të cilat ata ndërrojnë t’i ruajnë dhe dhurojnë për pingpongistët kosovarë.
“Unë atje kam bisedu me ekipin tim në Finlandë dhe me lojtarët atje kam bisedu që po du ma je nisë një donacioni për me i ndihmu klubit PriPing në Prishtinë dhe ata më kanë ndihmu dhe i kam ba sendet për me i pru këtu.”
“M’u kanë dashtë 2-3 javë kohë për me i mbledhë gomat dhe reketat.”
Iniciativa e Mërgimit e dëshmon qartazi se aktet e thjeshta por praktike mund të ndikojnë pozitivisht në mirëqenien e të rinjve të talentuar dhe të motivojnë ata që të ndjekin rrugën e Mërgimit brenda Kosovës.
“Asht mirë Kosovës me i ndihmu ku të ka mundësi, sikurse unë që i kam pru pajisjet e pingpongut, me ndihmu edhe në tjera sporte.”
I ngazëllyer dhe i lumtur për ndihmën dhe ndikimin pozitiv që mund ta bëjë për sportin kosovar, Mërgimi shprehet se veprime të tilla e forcojnë lidhjen e tij me Kosovën dhe u bënë thirrje edhe të tjerëve që ta bëjnë një gjë të tillë.
“Unë shumë ndjehem i lumtur që mundem me i ndihmu Kosovës; vendit ku kam lindur unë dhe që mundem me ju ndihmu të rinjve me lujtë (pingpong).”
“Asht mirë të rinjve në Kosovë me ju ndihmu, sepse këtu nuk janë kushtet fort të mira. Pra, me e ba Kosovën me sportistë të mirë.”
Ngjashëm shprehet edhe Orana, duke u bërë thirrje mërgimtarëve për iniciativa të ngjashme.
“Kisha dashtë me e ba një thirrje edhe për mërgimtarët e tjerë, edhe për disaporën tonë me ju ndihmu klubeve të ndryshme, jo veç në sportin e pingpongut, por edhe klubet e tjera, në vendet ku ata jetojnë e kanë kontakte me klube të ndryshme. Kështu që, pse jo përveç ndihmës financiare që e bëjnë përgjatë gjithë vitit, me ju ndihmu edhe klubeve të tjera me pajisje të ndryshme.”
Madje ai thekson edhe një aspekt shumë të rëndësishëm të cilin aktivizimi qytetar, puna vullnetare e ajo bamirëse e ushqejnë edhe më shumë: motivimin.
“Punë vullnetare mujnë me ba të gjithë. Kjo nuk është diçka që të merr energji dhe kohë, por të jep motiv nëse ti kontribuon.”
Edicionin #18 të plotë e gjeni KËTU 🙂
Kliko këtu dhe bonja Follow/pëlqeje Katror.info për me pa veç Lajme të Mira 🙂
Përgatiti:
