Meta ka njoftuar planet për të ndërtuar një kabllo nënujore 50,000 kilometra të gjatë në të gjithë botën.
Gjiganti i teknologjisë tha se Projekti Waterworth – që lidh SHBA-në, Indinë, Afrikën e Jugut, Brazilin dhe rajone të tjera – do të jetë projekti më i gjatë i kabllove nënujore në botë kur të përfundojë, transmeton Telegrafi.
Meta, e cila zotëron Facebook, Instagram dhe WhatsApp, ka kërkuar të zgjerojë praninë e saj në teknologji përtej mediave sociale, duke përfshirë inteligjencën artificiale (AI) dhe infrastrukturën që e mbështet atë.
Mundesh me e lexu edhe…
Ajo tha se projekti i saj i ri kabllor do të sigurojë “lidhje lider në industri” në pesë kontinente të mëdha, dhe do të ndihmojë në mbështetjen e projekteve të saj të AI.
“Ky projekt do të mundësojë një bashkëpunim më të madh ekonomik, do të lehtësojë përfshirjen digjitale dhe do të hapë mundësi për zhvillim teknologjik në këto rajone”, tha Meta në një postim në blog.
Kablloja do të ishte më e gjata deri më tani që përdor një sistem me 24 çifte fibrash, duke i dhënë një kapacitet më të lartë.
Kabllot nënujore janë bërë gjithnjë e më të rëndësishme, pasi ato ofrojnë mjetet për të fuqizuar një sërë shërbimesh digjitale dhe për të transferuar të dhëna në mbarë botën me shpejtësi.
Një statistikë e cituar rregullisht sugjeron se më shumë se 95 për qind e trafikut të internetit në botë, transferohet përmes kabllove nënujore.
Firma e kërkimit të tregut të telekomunikacionit TeleGeography, thotë se aktualisht ekzistojnë më shumë se 600 sisteme kabllore nënujore të njohura publikisht në mbarë botën.
Kjo përfshin kabllon 2Africa, të mbështetur nga Meta dhe operatorët e rrjetit celular si Orange, Vodafone dhe China Mobile, i cili lidh tre kontinente dhe përfshin 45,000 kilometra.
Dhe firmat e teknologjisë që shërbejnë si ofruesit kryesorë të shërbimeve të internetit, kanë investuar shuma të mëdha në infrastrukturën kabllore.
Google tha në vitin 2024 se do të ndërtonte kabllon e parë nënujore që lidh Afrikën dhe Australinë, dhe njoftoi një investim prej 1 miliard dollarësh për të rritur lidhjen me Japoninë me dy kabllo të reja nënujore në Oqeanin Paqësor.
Analisti i telekomunikacionit dhe teknologjisë, Paolo Pescatore, i tha BBC-së, se Meta “ka treguar një dëshirë të fortë për të zotëruar më shumë nga pjesa e lidhjes”.
Rritja e rëndësisë së kabllove nënujore ka rritur shqetësimet mbi ndjeshmërinë e tyre ndaj sulmeve ose aksidenteve.
Pas një sërë kabllosh të prera, ekspertët kanë thënë se infrastruktura e komunikimit nënujor është një arenë në rritje për tensionet gjeopolitike dhe konfliktet.
NATO nisi një mision në janar për të rritur mbikëqyrjen e anijeve në Detin Baltik, pas dëmtimit të kabllove kritike nënujore vitin e kaluar.
Meta tha në postimin e saj në blog duke njoftuar Projektin Waterworth se do të vendoste sistemin e saj kabllor deri në 7,000 metra thellësi, dhe “do të përdorte teknika të zgjeruara të pozicionimit në zonat me rrezik të lartë, të tilla si ujërat e cekëta pranë bregut, për të shmangur dëmtimet nga ankorimet e anijeve dhe rreziqe të tjera”./Katror.info
Përgatiti:
