Ministria e Kulturës, Rinisë dhe Sportit ka hapur më 07.03.2025, thirrjen për mbështetje financiare për studime në fushën e kulturës, trashëgimisë kulturore dhe sportit për vitin 2025.
Sipas MKRS-së, të drejtë aplikimi në këtë thirrje publike për mbështetje financiare studimore kanë individët që dëshmojnë se programi studimor apo programi i specializimit është i profilizuar në fushat specifike të kulturës, trashëgimisë kulturore dhe sportit siç janë të listuar në ti kategoritë e thirrjes.
Qëllimi i kësaj thirrje, sipas ministrisë është ngritja e kapaciteteve profesionale dhe zhvillimi i kuadrove në fushat për të cilat është hapur thirrja, të cilat prekin MKRS-në dhe institucionet vartëse të saj. Shuma e mbështetjes arrin 15 mijë euro.
Mundesh me e lexu edhe…
“Përmes kësaj thirrje publike do të mbështeten programe të nivelit Bachelor, programe të specializuara në master, doktoraturë dhe pos-doktoraturë për studime jashtë vendit”- thuhet në thirrje.
Lehtësirat për përfituesit
Thirrja është e ndarë të tri kategori.
Në kategorinë e parë:
Mbështetje financiare studimore në fushën e kulturës, përfshinë fushat: Menaxhim i artit, menaxhim kulturor; histori e artit; kritikë e artit; studime bibliotekare, arkivim; koreografi; mjeshtër ndriçues për teatër ose dhe film; mjeshtër i zërit për teatër ose dhe film; kurator/e për galeri; restaurim i veprave të artit; dhe të fusha tjera që ndërlidhen me fushat e artit dhe kulturës.
Në të dytën, mbështetje financiare studimore në fushën e trashëgimisë kulturore, përfshinë fushat: Arkitekturë – konservim – restaurim; planifikim hapësinor i konservim i integruar; shkenca të arkeologjisë; antropologji (fizike, biologjike, kulturore, dhe linguistike); histori e arkitekturës – histori e artit; arkitekturë – konservimi i arkitekturës moderne; muzeologji (menaxhim i muzeve, programe kuratoriale, menaxhim i ekspozitave, hulumtim); konservim dhe restaurim i artefakteve (gur, dru, metal, tekstil, qeramikë etj.); menaxhim i trashëgimisë kulturore; dhe fusha tjera që ndërlidhen me fushën e trashëgimisë kulturore.
Në të tretën mbështetja studimore financiare për sport përfshinë fushat: Administrim – menaxhim sportiv; mjekësi sportive; shkenca sportive; biznes -industri sportive; gazetari sportive; trajner sportiv; organizim dhe menaxhim i ngjarjeve sportive; aktivitet Fizik dhe shëndet; dhe fusha tjera që ndërlidhen me fushën e sportit.
Sipas thirrjes, mbështetja financiare studimore për të tri kategoritë vlen për semestrin e dytë të vitit akademik 2024/2025 dhe/ose për vitin akademik 2025/2026.
Shuma maksimale e mbështetjes për përfituesit është 15,000.00 euro.
Afati për aplikim është 20 deri më 4 prill 2025.
Të mirat e thirrjes
Thirrja nuk parash ndonjë obligim për përfituesit. KALLXO.com ka pyetur MKRS nëse përfituesit e thirrjes do të kenë ndonjë obligim ndaj saj për një periudhe të caktuar, por nuk ka marrë përgjigje deri në publikimin e artikullit.
Në anën tjetër njohës të zhvillimeve kulturore kanë thënë për KALLXO.com se thirrja do të ndikojë në krijimin e kuadrove që i mungojnë fushave përkatëse në kulturë, trashëgiminë kulturore e sport.
Shkrimtari e studiuesi Avni Rudaku, thotë se thirrjet publike janë shtuar dhe kjo i shërben ofrimit të përvojave ndërkombëtare në Kosovë.
“Do të sillej shumë përvojë nga jashtë, pasi jemi dobët me kuadro në trashëgimi kulturore, e veçmas për restaurim e konservim. Vendet e huaja kanë shumë traditë të zhvilluar shkencore e institucionale dhe thirrjet e tilla janë të mirëseardhura”- thotë ai për KALLXO.com.
Ilir Muharremi, kritikë e studiuesi i artit, thotë për KALLXO.com se mbështetja financiare për studentët që ndjekin studime jashtë vendit në fusha që lidhen me kulturën dhe trashëgiminë kulturore është një investim i rëndësishëm për të ardhmen e Kosovës. “Ky program jo vetëm që u jep mundësi të rinjve të fitojnë njohuri dhe përvojë në institucione akademike prestigjioze, por edhe ndihmon në sjelljen e këtyre njohurive mbrapsht për të avancuar fushën e kulturës dhe trashëgimisë kulturore në vend”- ka thënë ai.
Sipas tij, përvoja e fituar nga studentët në universitetet e huaja mund të kontribuojë në zhvillimin e politikave më të mira për ruajtjen dhe promovimin e trashëgimisë sonë kulturore. /Katror.info
Përgatiti:
