Mitrovica do të jetë nikoqire e rreth 200 organizatave kulturore nga mbi 40 shtete të Evropës në vitin 2027.
Lajmi u bë i ditur nga organizata kulturore 7Arte, e cila ka fituar të drejtën për të organizuar edicionin e ardhshëm të TEH Camp Meeting, një nga ngjarjet më të rëndësishme të rrjetit evropian Trans Europe Halles.
Në një njoftim, 7Arte bëri të ditur se në Kuvendin e Përgjithshëm të rrjetit evropian Trans Europe Halles, organizata kulturore 7Arte u përzgjodh me shumicë votash për ta organizuar edicionin e vitit 2027 të TEH Camp Meeting – një nga ngjarjet më të rëndësishme të bashkëpunimit kulturor në Evropë.
Mundesh me e lexu edhe…
Sipas këtij njoftimi, ngjarja pritet të shndërrojë qytetin në një qendër të shkëmbimit artistik, rrjetëzimit profesional dhe bashkëpunimit ndërkombëtar. “Në vitin 2027, Mitrovica do të mirëpres rreth 200 organizata kulturore nga mbi 40 shtete, duke e shndërruar qytetin në një qendër të shkëmbimit artistik, rrjetëzimit profesional dhe bashkëpunimit ndërkombëtar”, thuhet në komunikatën e 7Arte.
Organizata vlerëson se ky zhvillim përfaqëson një moment historik për skenën kulturore të Kosovës.
“Ky zhvillim përfaqëson një moment historik për 7Arte dhe për gjithë skenën e pavarur kulturore të Kosovës, duke ofruar mundësi të jashtëzakonshme për promovimin e vlerave lokale, forcimin e ekonomisë kulturore dhe rigjallërimin e Mitrovicës në të dy anët e lumit Ibër”, thuhet më tej në njoftim.
Trans Europe Halles është një rrjet me rreth 200 qendra kulturore të pavarura në Evropë, që mbështet transformimin e hapësirave të braktisura në qendra të gjalla për artin dhe komunitetin.
Përmes organizimit të kampit kulturor, 7Arte synon të vendos Mitrovicën në hartën evropiane të qendrave kulturore.
“Përmes kampit të vitit 2027, 7Arte synon ta vendos Mitrovicën në hartën evropiane të qendrave kulturore, duke i shndërruar hapësirat kulturore e publike në një burim të ri për zhvillim të qëndrueshëm, kreativitet dhe bashkëjetesë”, përfundon njoftimi i organizatës. /Katror.info
Përgatiti:
