Në Ditën Botërorë të Lirisë së Mediave Muhamet Jashanica, drejtor ekzekutiv i Katror Media u nderua me çmimin për Lirinë e Shtypit “Ibrahim Sefedini” për vitin 2025, akorduar nga Distrikti Rotary Shqipëri-Kosovë, Rotary Club Vitia në bashkëpunim me Komisionin e Pavarur tëi Mediave – KPM dhe Institutin e Medias.
Jashanica është vlerësuar për “kontibutin e tij të jashtëzakonshëm në gazetari dhe për përkushtimin e palodhur në promovimin e vlerave thelbësore të Rotary-s. Ky nder i veçantë shpreh mirënjohjen e thellë për guximin dhe integritetin e tij të pathyeshëm në mbrojtje të lirisë së shprehjes dhe etikës profesionale,” thuhet në dedikim.
Ismajl Baftijari, nga Rotary Club Vitia në ceremoninë e ndarjes së çmimit vlerësoi lart punën e Jashanicës dhe Katror Media.
Mundesh me e lexu edhe…
“Nën ndikimin e tij Katror Media është shndërruar në një burim të besueshëm dhe me ndikim në fushën mediatike duke ofruar një alternativë ndaj mediave tradicionale përmes vizionit strategjik dhe krijimit inovativ të përmbajtjes. Ai e ka pozicionuar Katror Media si një aktor kyç në peizazhin mediatik rajonal,” u shpreh Baftijari.
Guvernatori i Distriktit Shqipëri Kosovë Butrint Batalli e vlerësoi rolin e Katror Media, si media unike në Kosovë që merret me lajme të mira dhe gazetari konstruktive.
“Katrori, për ne si Rotari është një partner shumë i mirë, i veçantë, i cili na ka përcjellur në të gjitha aktivitetet dhe projektet tona që ne i ndërmarrim në shërbim të komunitetit, një vlerë e shtuar për shoqërinë kosovare dhe aty rajonale dhe më gjerë. Përse e them këtë?”
“Në këtë kohë, kur neve po bombardohemi nga dezinformimet apo nga fake news, nga mediat roze apo lajmet roze, të cilat janë shumë më lehtë me depërtu; me depërtu me lajme me sloganin: ‘Veç lajme të mira’ është goxha sfiduese dhe mu për këtë e përgëzojmë dhe e mbështesim moralisht dhe në çfarëdolloj aspekti dhe ne e shohim si vlerë të shtuar të shoqërisë sonë,” u shpreh Batalli.
Pas marrjes së çmimit, Muhamet Jashanica ndau emocionet dhe reflektimet e tij për këtë vlerësim.
“Është me të vërtetë kënaqësi e madhe me pranu një çmim të tillë, marrë parasysh edhe faktin që për neve (në Katror) është veç viti i tretë edhe vlerësohemi sot në Ditën Botërore të Lirisë së Medias. Po ashtu, ky çmim vjen edhe si vlerësim për gazetarinë konstruktive që Katror Media që prej ditës së parë e promovon edhe e aplikon. Është e vetmja platformë, është i vetmi medium që punon mbi bazën e gazetarisë konstruktive, një model shumë i dashur dhe i veçantë në vendet skandinave tashmë, dhe po ashtu në disa vende evropiane”.
“Është kënaqësi që gazetaria konstruktive që ka për qëllim, edhe ofrimin e alternativave për çështje të caktume vlerësohet sot në Viti në Ditën Ndërkombëtare të Lirisë së Medias, po edhe në nivel vendi, besoj që jemi t’u bo një punë të mirë edhe këtë e marrim gjithmonë edhe prej asaj që është feedback prej audiencës sonë, prej lexuesve tanë,” tha Muhamet Jashanica, Drejtor Ekzekutiv i Katror Media.
Katror Media e themeluar në vitin 2022 është platforma e parë në gjuhën shqipe që fokusohet në lajme të mira dhe gazetari konstruktive./Katror.info
