Sot nis 27-vjetori i Epopesë e Ushtrisë Çlirimtare të Kosovës (UÇK), ku përkujtohet rënia dhe heroizmi i familjes Jashari.
Kryeministri i Kosovës, Albin Kurti, ka përkujtuar sakrificën e familjes Jashari në Epopenë e Ushtrisë Çlirimtare të Kosovës.
Në mbledhjen solemne të Qeverisë, Kurti ka deklaruar se qeverisja aktuale është në udhën e përcaktuar nga Epopeja “dhe kemi ecur në ritmin e saj dhe në perspektiven e hapur”.
Mundesh me e lexu edhe…
Sipas Kurtit, secili përvetësim i epopesë së luftës është korruptim i idealit dhe i luftës.
“Çlirimi i një populli e sovranizimi përbën lirinë që fitohet e që mbrohet. Sovraniteti është emancipim, e çdo lëshim në kufi a veri ishte korruptim i sovranitetit në të kaluarën. Ne kemi shpallur zotimet tona për luftë ndaj korrupsionit e krimit të organizuar. Burimi i krimit është në vendet ku është bërë kompromis me lirinë”, ka deklaruar Kurti.
Ndërsa, presidentja e Republikes së Kosovës është shprehur se “Epopeja e UÇK-së, është një testament i përjetshëm i qëndresës, i sakrificës dhe i pathyeshmërisë së popullit tonë!”
Ndërkaq, kryetari i Lidhjes Demokratike të Kosovës, Lumir Abdixhiku, ka deklaruar se sakrifica e familjes Jashari është themeli i lirisë, duke thënë se përkujtimi i luftës “do të thotë të kujtosh e shënosh vetë fondamentin e shtetit të Kosovës”.
Kryetari i Aleancës për Ardhmërinë e Kosovës, Ramush Haradinaj, është shprehur se familja Jashari është zemër e qëndresës, e UÇK-ja tha se është vulë e përjetshme e krenarisë dhe arritjes kombëtare.
Ndërsa, kryetari i Partisë Demokratike të Kosovës, Memli Krasniqi, ka deklaruar se emrat e familjes Jashari janë më të mëdhenj se koha, më të fuqishëm se dhembja e më të ndritshëm se çdo yll.
Sipas Krasniqit, Prekazi është altari i lirisë dhe themeli i shtetit.
“Sot, pas 27 vitesh, emrat e tyre janë më të mëdhenj se koha, më të fuqishëm se çdo dhembje, më të shndritshëm se çdo yll! Ata janë aty – të përjetshëm – në historinë tonë, në frymën e kësaj toke të lirë, në gjakun që rrjedh në damarët e çdo shqiptari! Prekazi nuk është thjesht një vend – është altari i lirisë, themeli i shtetit, zemra e kombit! Sepse, siç ka thënë vetë komandanti legjendar: Shumë erëra kanë kaluar, por lisit rrënjët s’kanë mundur t’ia shkulin”, ka shkruar ai në Facebook të mërkurën./Katror.info
Përgatiti:
