Traileri i parë për sezonin e dytë të serialit Wednesday i cili mban rekordin si më i shikuari në historinë e Netflix u ka ofruar fansave pamjet e para të Joanna Lumley dhe Steve Buscemi në rolet e tyre të reja, përkrah disa prej personazheve të dashur që rikthehen në ekran.
Netflix ka bërë të ditur se sezoni i ri do të ndahet në dy pjesë: episodet e para do të transmetohen më 6 gusht, ndërsa pjesa e dytë do të vijë më 3 shtator, shkruan BBC, transmeton Katror.info.
Këtë sezon, historia ndjek Wednesday Addams, e interpretuar nga Jenna Ortega, teksa ajo kthehet në Akademinë Nevermore, e cila tani drejtohet nga drejtori i ri, Barry Dort (i luajtur nga Steve Buscemi).
Mundesh me e lexu edhe…
Në këtë vit shkollor i bashkohet Nevermore edhe vëllai i saj më i vogël, Pugsley (Isaac Ordonez), një personazh që producenti ekzekutiv Tim Burton e përshkruan si “një i veçuar mes të veçuarve”.
Në sezonin e ri, prindërit e Wednesday do të kenë një prani më të madhe në ambientet e shkollës diçka që Netflix e përshkruan si “një formë të rrallë të re të torturës për një detektive amatore jashtëzakonisht të pavarur”.
Traileri i parë i plotë, i publikuar në mënyrë simbolike të mërkurën, nis me Wednesday-n teksa kalon përmes kontrollit të sigurisë në aeroport.
Pas sinjalizimit të detektorit të metaleve, ajo detyrohet të nxjerrë nga çanta e saj një grusht hekuri, një pajisje elektrike për bagëti, disa thika dhe dorën e famshme, Thing. Por ajo ndalet pikërisht për diçka tjetër: një tub kremi kundër diellit që po mbante me vete.
“Wednesday Addams është një nga personazhet më të veçantë dhe interesantë të të gjitha kohërave,” tha Jenna Ortega gjatë prezantimit të trailerit.
“Të luaja këtë rol qoftë edhe një herë të vetme ishte një përvojë e pabesueshme, por të kthehem sërish në kostumin dhe botën e saj është një kënaqësi më vete”, shtoi ajo.
“Ajo është gjithmonë një hap përpara të tjerëve në çdo bisedë prandaj të luash një personazh që është shumë më inteligjent se ti vetë, është një përzierje e çuditshme mes humorit dhe kënaqësisë”, tha ajo.
Për aktoren Joanna Lumley, Ortega shtoi se ajo është “e përkryer dhe jashtëzakonisht qesharake” në rolin e saj të ri.
Lumley, “e përkryer dhe qesharake”
Aktorja e njohur britanike Joanna Lumley i është bashkuar kastit të Wednesday në rolin e Hester Frump gjyshes së Wednesday dhe aleates së saj më të ngushtë. Ajo është gjithashtu nëna komplekse e Morticias.
“Kënga e saj që në ditën e parë në set ishte e jashtëzakonshme. Thjesht u bë Hester menjëherë, dhe çdo rresht që tha ishte perfekt,” tha krijuesi i serialit Miles Millar.
“Ajo është e përkryer dhe jashtëzakonisht qesharake”, shtoi ai.
Vetë Lumley e përshkroi atmosferën në Nevermore si “dehëse”, duke shtuar: “Është fantastike. Vesh shumë paruke të mëdha njëra mbi tjetrën dhe shumë veshje të ngushta e të shtrënguara. Dhe këtë e dua.”
Buscemi si drejtori misterioz i Nevermore
Aktori legjendar Steve Buscemi (Fargo, Reservoir Dogs) do të luajë rolin e drejtorit të ri të shkollës Nevermore, Barry Dort.
Sipas Buscemit, ky personazh është “një figurë paksa misterioze”. Ai shton: “Ka diçka që nuk shkon me të, por ai e do shkollën dhe ka një krenari të thellë për të qenët i përjashtuar.”
Rikthimi i Wednesday dhe një vështrim në sezonin e ri
Sezoni i parë i Wednesday ishte suksesi më i madh i Netflix deri më sot, duke e shndërruar Jenna Ortega në një yll të ekranit. Që prej atëherë, ajo ka luajtur në filma si Beetlejuice Beetlejuice, Death of a Unicorn dhe Scream XI.
Në sezonin e ri, vëllai i vogël i Wednesday, Pugsley, regjistrohet në Nevermore, ndërsa prindërit e saj do të kenë një prani më të shtuar në kampus.
Në trailer, Morticia (e luajtur nga Catherine Zeta-Jones) shprehet se është hera e parë që vajza e saj kthehet me dëshirë në shkollë. Por Wednesday e përshkruan kthimin si “sikur po rikthehet në skenën e krimit”, duke theksuar: “Unë tashmë e di ku janë varrosur trupat.”
“Ku ka vrasje dhe kaos, do të gjeni gjithmonë një Addams”, thotë Wednesday.
Netflix shpreson që sezoni i dytë të përsërisë suksesin e të parit. Vendimi për ta ndarë sezonin në dy pjesë me premierën më 6 gusht dhe vazhdimin më 3 shtator synon të mbajë të angazhuar abonentët dhe të rrisë pritjen dhe zhurmën rreth serialit. /Katror.info
Përgatiti:
