Simboli i Pavarësisë së Kosovës, NEWBORN, që ndodhet para Pallatit të Rinisë dhe Sporteve në Prishtinë, do të paraqitet këtë vit me një mesazh të ri dhe ngjyra të freskëta për 17-shkurtin, ditën kur u shpall Pavarësia, shkruan Katror.info.
Puna për ngjyrosjen dhe dizajnin ka nisur sot dhe pritet të përfundojë brenda disa ditëve.
Fisnik Ismaili, krijuesi i monumentit, njoftoi përmes rrjeteve sociale se mesazhi i këtij viti do të përqendrohet në temën e Inteligjencës Artificiale, duke reflektuar ndikimin e saj në shoqërinë moderne.
Mundesh me e lexu edhe…
“E pëlqeve apo e urreve, e deshte apo ia pate frikën, Inteligjenca Artificiale është këtu, edhe çdo ditë e më shumë po bëhet pjesë integrale e jetëve tona”, njoftoi Ismaili në rrjetin social Facebook, duke konfirmuar temën e sivjetme për NEWBORN.
NEWBORN, që simbolizon krijimin e shtetit të Kosovës, u dizajnua në një periudhë të shkurtër kohore prej 11 ditësh nga autori, Fisnik Ismaili. Monumenti u zbulua më 17 shkurt 2008, ditën e shpalljes së Pavarësisë, dhe gjatë asaj dite, më shumë se 150 mijë qytetarë nënshkruan në të, duke përfshirë liderët e asaj kohe, Fatmir Sejdiu dhe Hashim Thaçi.
NEWBORN është i ndërtuar nga një skelet çeliku dhe është mbuluar me një shtresë metali prej 4 mm, me çdo shkronjë që ka një lartësi prej tri metrash dhe peshon rreth një ton. Ky monument është një nga pikat më të vizituara në Kosovë dhe çdo vit ofron një mesazh të rëndësishëm për komunitetin ndërkombëtar./Katror.info
Përgatiti:
