Për herë të parë po bëhet renovim i plotë në Galerinë Kombëtare të Kosovës. Gjithashtu në kuadër të këtij intervenimi është parë si i domosdoshëm krijimi i hapësirave për deponimin e veprave të fondit shtetëror të saj, që deri më tani kanë qenë në një hapësirë të papërshtatshme.
“Si GKK jemi të entuziazmuar me fillimin e punimeve në Galeri, pasiqë me këto punë krijohen kapacitete të reja për ekspozim në Galerinë kombëtare por njëkohësisht edhe krijohen kushte adekuate për ruajtjen e koleksionit shtetëror të Republikës së Kosovës i cili gjendet në Galerinë Kombëtare”, tha Alisa Gojani Berisha, ud. drejtore e GKK, raporton RTKlive.
Për më shumë me këtë renovim do të krijohen hapësira shtesë për koleksionin e GKK.
Mundesh me e lexu edhe…
“Po, do të krijohen edhe hapësira shtesë, natyrisht duke mos intervenuar në fasadën e ndërtesës sepse objekti veq është në mbrojtje si objekt, por do të krijohen anekse shtesë të cilat do të ndihmojnë pikërisht hapësirat e depove e që janë për mbrojtjen e koleksionit”, tha ajo.
Sallat ekspozuese do ta kenë lartësinë e duhur për ekspozim, do të intervenohet në ndriçimin specifik dhe ventilimin. Ky projekt pritet që të zgjasë 9 muaj, i cili do t’i përmirësojë kushtet në aspektin funksional dhe teknik të ndërtesës, duke krijuar kushte optimale për ekspozim, krijimtari dhe zhvillim të aktiviteteve artistike./Katror.info
