Ka dy vjet që nxënësit e shkollës së mesme të ulët “Elena Gjika” në Prishtinë janë një hap përpara me teknologjinë. Kjo për shkak të posedimit të robotëve MacQueen+. Në 12 prej tyre, ata kanë shansin t’i praktikojnë njohuritë digjitale dhe programuese.
Këta nxënës së bashku me profesorin Betim Sherifi arritën që t’i fitojnë ato nëpërmjet garës së robotikës në kuadër të Kosova Makers League. Mirëpo, këtë fat nuk e gëzojnë të gjithë bashkëmoshatarët.
Pikërisht kjo organizatë po e shtyen përpara vullnetin për t’i bërë institucionet arsimore të ecin në hap me kohën. “Një robot për çdo fëmijë” quhet kampanja e tyre më e re, e cila synon që ta bëjë me robot gjysmën e shkollave publike në vend. Në formë të donacionit publik, ata kanë nisur grumbullimin e mjeteve financiare në “Kosova ideas”, ku caku final është 50 mijë euro.
Mundesh me e lexu edhe…
“Kampanja është lansuar tash e dy javë, do të jetë e hapur edhe 33 ditë mirëpo ne deri të premten duhet ta arrijmë 35% të shumës. Synojmë në total me i grumbullu 50 mijë euro që me u ble 908 robota që do të shpërndahen në 227 shkolla publike. Deri sot kemi arritur 28% të shumës me grumbullu, deri të premten duhet ta arrijmë 35%. Është shumë e rëndësishme me arrit 35% të shumës totale për shkak se nëse nuk arrihet atëherë kampanja dështon dhe largohet nga platforma Kosova Ideas”, thotë Elza Krelani nga “Kosova Makers League”.
Që nga donacioni i robotëve në shkollën e tij, Lekë Prapashtica, nuk ka nevojë që praktikën teknologjike ta kryejë në kurse private.
“Në fillim kam mësuar bazat në kurs, por mandej më shumë kam mësuar në klasën e 8 me shokët e mi këtu në shkollë dhe deri në klasën e 9-të do të mësojmë edhe më shumë”, thotë Prapashtica.
Të disponueshme për nxënësit nga klasa e parë e deri te e nënta, robotët pjesën më interesante e kanë te mënyra e funksionimit.
“Pjesët kryesore të robotit janë bateria, mikrobiti dhe ultrasonic sensor. Bateria e mundëson që roboti të lëvizë si dhe mikrobiti që është sikur truri i robotit i cili mund të lidhet me kompjuter me USB dhe ta përgatisim kodin. Ky është ultrasonic sensor dhe përfundi robotit janë sensorët në të cilën mund ta shikojmë rrugën se si ta ndjekin ngjyrën e zezë apo të bardhë”, thotë Diart nxënësi tjetër Makolli.
E krejt çka duhet për robotët është saktësia dhe përpikmëria. Këtë e dëshmon fakti që çdo lëvizje duhet të kodohet.
Profesori Sherifi si mentor i nxënësve tregon rëndësinë e robotëve për zhvillimin e aftësive teknologjike.
“Ne si shkollë kemi pasur fatin dhe sot i kemi 12 robotë të cilët mund t’i shfrytëzojnë edhe nxënësit e tjerë. Kampanja që është nisur nga “Kosovo Makers League” është e jashtëzakonshme dhe unë i ftoj të gjithë që kanë mundësi që të kontribuojnë që kjo kampanjë ta arrij mesazhin që ka një robot për çdo fëmijë në shkolla publike”, thotë Sherifi.
Për iniciativën “Një robot për çdo fëmijë” shpresohet përmbushja e qëllimit, pavarësisht mungesës së mbështetjes institucionale. Donatorë të vetëm kanë qenë organizatat e qytetarët vullnetmirë, teksa Elza Krelani bën thirrje duke potencuar të mirat e robotikës.
“Krejt këto i bëjnë me punu në grup me njëri tjetrin, shpesh e ndihmojnë njëri tjetrin me zgjedh problemin dhe krejt kjo i bën që me i fitu ato aftësi që kur ballafaqohen me tregun e punës e kanë më të thjeshtë dhe janë të gatshëm. Unë i ftoj të gjithë qytetarët, të gjitha institucionet, drejtoritë e arsimit, Ministrinë e Arsimit që të na bashkohen në këtë kampanjë, nismë për shkak se kjo është në dobi të shkollave tona, në dobi të shkollave publike të vendit tonë”, përfundon Krelani.
Deri më tani “Kosova Makers League” ka arritur që t’i mbështesë 25% të shkollave publike me robotë. Janë shpërndarë mbi 2500 robotë në 30 komuna të Kosovës. Edhe 25% e shkollave tjera pritet që të pajisen nëse arrihet kjo iniciativë. Nëse del e suksesshme i bie që gjysma e shkollave publike kanë pajisje të tilla teknologjike. / Katror.info
Edicionin #12 të plotë e gjeni KËTU 🙂
Kliko këtu dhe bonja Follow/pëlqeje Katror.info për me pa veç Lajme të Mira 🙂
Përgatiti:
