Në vitin 2022, Shqipëria kishte shpenzimet shëndetësore për kokë banori (publike +private), prej vetëm 734 euro. Ky ishte niveli më i ulët në Europë sipas raportit të fundit të Organizata për Bashkëpunim dhe Zhvillim Ekonomik (OECD) mbi gjendjen shëndetësore në Europë, vitin e kaluar. Shpenzimet për kokë banori për shëndetësinë në Shqipëri janë gati 5 herë më të ulëta se mesatarja e BE-së prej 3,533 eurosh.
Në rajon, shpenzimet më të larta për shëndetësinë i ka Mali i Zi, dy herë më shumë se tek ne (1593 euro), i ndjekur nga Serbia (1517), Maqedonia e Veriut (1142 euro), Bosnjë-Hercegovina (1072). Edhe nëse bëhen llogaritjet me popullsinë e fundit të CENS-it, prej 2.42 milion banorësh, sërish shpenzimet për kokë banori mbeten më të ulëtat në Europë, teksa nuk i kalojnë 820 euro, ose 4.3 herë më pak se në Europë, shkruan Revista Monitor.
Të dhënat tregojnë se Zvicra kryeson Europën për nivelin e lartë të shpenzimeve shëndetësore për kokë banori me 5630 euro në vit, e ndjekur nga Norvegjia me 5,376 euro.
Mundesh me e lexu edhe…
Midis vendeve të BE-së, shpenzimet shëndetësore për kokë banori ishin të larta në Gjermani me 5,317 euro kokë banori ose 50% mbi mesataren e BE-së. Shpenzimet shëndetësore në Austri dhe Holandë ishin gjithashtu të paktën 25% më të larta se mesatarja e BE-së.
Në anën tjetër, brenda BE-së, shpenzimet shëndetësore për kokë banori ishin më të ulëtat në Hungari, Kroaci, Bullgari dhe Rumani, me më pak se 1900 euro për person. Po në disa vende jashtë BE-së, shpenzimet shëndetësore ishin shumë më pak.
Për shembull, Turqia shpenzoi vetëm rreth 1000 euro për kokë banori, ndërsa në Shqipëri kjo shifër ishte më pak se 800 euro. Ndërkaq, shqiptarët janë më të shqetësuarit në rajon për kostot e larta të shërbimeve shëndetësore, sipas anketës së fundit të “Security Meter”, të zhvilluar në 6 vendet e rajonit nga Këshilli i Bashkëpunimit Rajonal (RCC).
Rezultatet treguan se 24% e shqiptarëve ishin shumë të shqetësuar, pasi nuk ishin në gjendje të përballonin kostot financiare për kujdes mjekësor rutinë dhe mjekim. Ky shqetësim ishte i pranishëm në një përqindje më të ulët ndër qytetarët e Bosnjës 16%, Kosovës 9%, Maqedonisë së Veriut 16%, Malit të Zi 20% dhe Serbisë, 20%.
OECD vë re se shpenzimet shëndetësore në vendet e Europës Perëndimore dhe Veriore ishin mbi pesë herë më të larta se në disa vende në Evropën Qendrore, Lindore ose Jugore.
Në periudhën e rritjes së ngadaltë, pas krizës financiare globale në 2008/09, rritja vjetore e shpenzimeve shëndetësore për kokë banori arriti në 3.4% mesatarisht në vendet e BE-së midis viteve 2015 dhe 2019. Me fillimin e pandemisë COVID-19 në fillim të vitit 2020, qeveritë akorduan burime të paprecedenta financiare për sektorin e shëndetësisë për të luftuar COVID-19 dhe për të trajtuar pasojat.
Rritja mesatare e shpenzimeve shëndetësore arriti gati 6% në terma realë në vitin 2020 dhe u përshpejtua në 9.6% më 2021-shin në vendet e BE-së, për të zhvilluar opsionet e trajtimit të pandemisë. Pas luftës në Ukrainë që nxiti krizën e energjisë dhe rritjen e kostove të jetesës, financimet për shëndetësinë u dobësuan.
Si rezultat, shpenzimet shëndetësore për kokë banori ranë ndjeshëm në vitin 2022 në të gjithë BE-në. Vlerësimet paraprake për vitin 2023 tregojnë për një tkurrje të mëtejshme të shpenzimeve shëndetësore në rreth gjysmën e vendeve të BE-së. Trajektorja e shpenzimeve të sistemeve shëndetësore po kthehet në nivelet para pandemisë. /Katror.info
Përgatiti:
