Festivali Ndërkombëtar i Operës “Rame Lahaj” (RLIOF) do të mbajë edicionin e tij të pestë nga data 23 korrik deri më 2 gusht 2025, duke sjellë një kapitull të ri nën temën frymëzuese “Ëndrra pa kufi, Opera pa mure”. Kjo moto e këtij viti bart një thirrje të fuqishme për tejkalimin e barrierave dhe për besimin në fuqinë transformuese të artit dhe ëndrrave, shkruan Katror.info.
Në një vend ku mungon një shtëpi e operës, organizatorët e festivalit kanë parë një mundësi për të krijuar diçka unike. Me pasion dhe përkushtim, RLIOF ka shndërruar çdo hapësirë në skenë, duke sjellë magjinë e operës pranë publikut kosovar dhe ndërkombëtar.
“Ëndrra pa kufi, Opera pa mure” nuk është vetëm një slogan, por një frymë që do të përshkojë gjithë festivalin. Artistë nga e gjithë bota do të jenë pjesë e këtij edicioni, duke dëshmuar se muzika është gjuha që na bashkon të gjithëve, pavarësisht prejardhjes apo kufijve.
Mundesh me e lexu edhe…
Organizatorët theksojnë se ky festival është më shumë se një ngjarje artistike – është një dëshmi e potencialit të Kosovës për të ndërtuar një të ardhme kulturore të qëndrueshme dhe të fuqishme. “Kosova është gati. Është e denjë dhe ka nevojë për një shtëpi ku arti të marrë frymë, ku talenti të lulëzojë,” thuhet në njoftimin e festivalit.
Në vitin e tij jubilar, RLIOF vijon të ndërtojë themelet për një trashëgimi të qëndrueshme kulturore. Me çdo edicion, ai vendos një tullë të re në ndërtimin e një shtëpie të vërtetë për operën në Kosovë.
RLIOF 2025 premton të jetë një festë e artit dhe një rrugëtim i përbashkët drejt një të ardhmeje ku opera nuk ka mure, dhe ëndrrat nuk njohin kufi./Katror.info
