Organizata Botërore e Turizmit (UNWTO) bën çdo vit listat e destinacioneve më të mira në botë.
Ajo u rekomandon udhëtarëve edhe komunitetet rurale me një ritëm më të ngadaltë të jetës. Sot ato janë destinacionet më aktuale me një peisazh të egër natyror dhe një traditë të pasur, gjë që vërtetohet nga lista e fshatrave më të mirë turistikë në botë. Një nga më të mirat ndodhet në Itali.
Vitet e fundit, UNWTO ka njohur fshatra në mbarë botën që po udhëheqin rrugën në edukimin e zonave rurale dhe ruajtjen e peisazheve, diversitetit kulturor, vlerave lokale dhe traditave të kuzhinës. Në këtë listë përfshihet fshati Lerici nga Italia.
Lista përmban 54 fshatra që janë përzgjedhur bazuar në nëntë kritere të ndryshme, duke përfshirë sa mirë ruajnë (dhe shfaqin) natyrën dhe mjedisin e tyre, angazhimin e tyre për qëndrueshmërinë ekonomike dhe mjedisore dhe ruajtjen e trashëgimisë kulturore.
Italia nuk është vetëm Venecia apo Cinque Terre. Për udhëtarët që kërkojnë pamje të bukura të detit, plazhe të pastra dhe shtëpi shumëngjyrëshe, ka një destinacion tjetër në rajonin e Liguria për t’u shtuar në listën e tyre. I vendosur në bregdetin veriperëndimor italian, 100 kilometra në jug të Genovas, ndodhet Lerici.
Ky vend quhet edhe “Gjiri i Poetëve”, sepse aty organizohen festivale të shumta kulturore dhe artistike, ekspozita artistike dhe koloni. Për shekuj me radhë, ai ka qenë një vend takimi për poetë dhe artistë, si Shelley, Virginia Woolf apo regjisori Pasolini.
Ndryshe nga shumë vende të tjera bregdetare italiane, Lerici ka ruajtur industrinë e tij tradicionale të peshkimit. Lerici ka kultivimin më të vjetër të midhjeve në Itali që daton në shekullin e 19-të. Megjithatë, popullsia vendase e kupton se sot peshkimi duhet të jetë i qëndrueshëm, ndaj të gjithë kanë hequr dorë nga peshkimi intensiv.
Ndër iniciativat e ndryshme të qëndrueshmërisë, Lerici po zbaton një projekt pilot të quajtur Smart Bay, i cili përfshin kërkimin shkencor dhe monitorimin e gjirit dhe ekosistemeve të tij. Gjithashtu janë futur panelet diellore, plastika një përdorimshe është e ndaluar, si dhe të gjitha aktivitetet që mund të rrezikojnë mjedisin.
Lerici është më i njohur për rrethinat e tij piktoreske dhe arkitekturën e mrekullueshme. Karakteristika më e rëndësishme është kalaja mesjetare, Castello di Lerici, e cila ofron një pamje panoramike të gjirit të La Spezia-s dhe zonave përreth. Vendi ka një bregdet simpatik me ndërtesa shumëngjyrëshe, dyqane dhe restorante, duke e bërë atë një vend të këndshëm për t’u eksploruar. Vendasit kanë një qëllim, duan të bëhen një destinacion që jo vetëm pushton me bukurinë e tij natyrore, por përfaqëson edhe një model të triumfit dhe qëndrueshmërisë mjedisore. /Katror.info