Gjatë vizitës zyrtare në Japoni, Presidentja e Republikës së Kosovës, Vjosa Osmani, u takua me Kryeministrin japonez, Shigeru Ishiba.
Ajo e falënderoi për mikpritjen e ngrohtë dhe për angazhimin e tij në forcimin e partneritetit ndërmjet dy vendeve.
”Në Tokio, e falënderova Kryeministrin japonez Shigeru Ishiba për mikpritjen e ngrohtë dhe për përkushtimin e tij për thellimin e partneritetit mes Kosovës dhe Japonisë”, shkroi Osmani në Facebook.
Mundesh me e lexu edhe…
Në këtë takim, të dy liderët diskutuan mundësi konkrete për bashkëpunim dypalësh në fusha të ndryshme. Presidentja Osmani theksoi se Kosova mbetet një partnere e besueshme, e përkushtuar ndaj paqes, demokracisë dhe bashkëpunimit ndërkombëtar vlera që e lidhin ngushtë me Japoninë.
“Në këtë frymë, presidentja riafirmoi përkushtimin e Republikës së Kosovës për zhvillim të mëtejshëm të bashkëpunimit ekonomik, përfshirë përmes investimeve japoneze në industri kyçe.
Në këtë kontekst, presidentja foli për rëndësinë e rritjes së shkëmbimeve ndërmjet bizneseve dhe për heqjen e regjimit të vizave për të gjitha pasaportat e shtetaseve të Kosovës, si mënyrë për ta lehtësuar këtë bashkëpunim, gjersa e falënderoi Japoninë për heqjen e vizave për mbajtësit e pasaportave zyrtare dhe diplomatike”, thuhet në njoftim.
Presidentja gjithashtu vuri theksin te nevoja për zgjerimin e bashkëpunimit në fusha të tjera me interes të ndërsjellë, si arsimi, kultura, turizmi dhe inovacioni.
”Populli i Kosovës është gjithnjë mirënjohës për mbështetjen e vazhdueshme të Japonisë në çdo etapë të shtetndërtimit tonë, integrimit ndërkombëtar dhe zhvillimit të qëndrueshëm”, theksoi presidentja Vjosa Osmani.
Në fund, Presidentja Osmani theksoi rëndësinë e mbështetjes japoneze për anëtarësimin e Kosovës në organizata ndërkombëtare, si dhe për forcimin e pozitës së saj në skenën globale. /Katror.info
Përgatiti:
