Presidentja Vjosa Osmani ka pritur në takim presidentin e Këshillit Evropian, Antonio Costa, në Presidencë.
Costa në Kosovë vjen pas vizitës që kishte në Mal të Zi.
Osmani dhe Costa u takuan në një konferencë për media në orën 17:30.
Mundesh me e lexu edhe…
Presidenti i Këshillit Evropian, António Costa, në konferencën për media u shpreh se e ardhmja e Kosovës është në BE, ndërsa foli edhe lidhur me masat e BE-së ndaj Kosovës.
“Këto masa janë të lidhura me nevojën për deeskalimin e rajonit dhe veriut të vendit. Unë dëshiroj që ta arrijmë deeskalimin sa më shpejt, të ecim përpara dhe të heqim masat”.
Ai shtoi se ndjehet optimist në angazhimin e Kosovës në rrugëtimin evropian.
“Shpresoj që ngjarjet e fundit të mos përfaqësojnë një prirje të re por të jenë përjashtim që konfirmon rregullin se ju jeni të angazhuar në plotni në këtë rrugë evropiane për ta shtensionuar situatën dhe sic tha Osmani dje, për t’u angazhuar në dialogun mes Kosovës dhe Serbisë”, tha Costa.
Ndërsa, Presidentja Vjosa Osmani foli rreth ngjarjeve të fundit politike në vend dhe rreth takimit konsultativ me partitë politike, të thirrur për nesër, për të cilën synon të gjejë zgjidhje për ngërçin politik dhe të shmangë pasojat e moskonstituimit të Kuvendit.
Në konferencën për media me presidentin e Këshillit Evropian, Antonio Costa, presidentja Osmani tha se ky është vetëm fillimi i një serie takimesh që mund të zhvillohen edhe në formate të tjera.
Sipas saj, mosfunksionimi i Kuvendit rrezikon institucionet dhe dëmton projekte të rëndësishme për vendin, përfshirë ratifikimin e marrëveshjeve ndërkombëtare.
“I falënderoj liderët e partive politike që janë përgjigjur pozitivisht. Ky është vetëm fillimi i një serie takimesh. Ne do të vazhdojmë varësisht si shkojnë nesër takimet, do të vazhdojmë, qoftë në atë format apo formate të ngjashme apo takime një nga një me partitë politike. Si institucion i Presidencës jemi në zbatim kushtetues. Sipas ligjit, moskonstituimi i Kuvendit e rrezikon funksionimin kushtetues të institucioneve dhe kjo është arsyeja pse i kam thirrur liderët që të diskutojmë rrugët përpara. Nuk do të paragjykoj tani për rezultatet. Shpresoj që të angazhohen duke vënë parësor interesin e vendit dhe kur ndodh rezultatet janë pozitive. Kosova ka nevojë sa më parë për Kuvend, në qoftë se për asgjë tjetër, për atë që e diskutuam me Costan, në mënyrë që të ketë vendim të Kuvendit të Kosovës sa i përket Planit të Rritjes, por ka edhe shumë marrëveshje ndërkombëtare. Nëse nuk ratifikohen së shpejti pëson Kosova, shteti dhe qytetarët tanë”, tha presidentja Osmani.
Antonio Costa paralajmëroi takim edhe me kryeministrin në detyrë, Albin Kurti, sipas njoftimit zyrtar të Këshillit Evropian.
Vizita e sotme shënon herën e parë që Costa viziton Kosovën në cilësinë e tij si President i Këshillit Evropian – një detyrë të cilën ai e mori zyrtarisht më 1 dhjetor 2024, pasi u zgjodh nga liderët e BE-së më 27 qershor 2024. /Katror.info
Përgatiti:
