Panairi Kombëtar i Punës dhe Karrierës 2025 u zhvillua me sukses në “Sallën 1 Tetori” në Prishtinë, duke shënuar një nga ngjarjet më të rëndësishme të vitit në fushën e punësimit dhe zhvillimit profesional në Kosovë. Me pjesëmarrjen e rreth 130 bizneseve dhe më shumë se 8,000 vizitorëve, panairi ofroi mbi 500 mundësi për punësim, praktikë profesionale dhe avancim në karrierë.
Ky panair, i konsideruar si ngjarja më e madhe e këtij lloji në vend, kishte në fokus veçanërisht të rinjtë, duke i ofruar atyre qasje të drejtpërdrejtë me punëdhënës, institucionet arsimore dhe organizata të ndryshme që kontribuojnë në zhvillimin profesional.
Në hapje të aktivitetit, Ambasadori i Gjermanisë në Kosovë, z. Joern Rohde, theksoi përkushtimin e vazhdueshëm të Gjermanisë për të mbështetur zhvillimin ekonomik në Kosovë:
Mundesh me e lexu edhe…
“Gjermania mbetet e përkushtuar në mbështetjen e partnerëve kombëtarë në nxitjen e zhvillimit ekonomik. Një aspekt kyç i këtij përkushtimi është ndihma për qytetarët në qasjen në mundësi karriere dhe përdorimin e njohurive brenda vendit.”
Nga Universiteti i Prishtinës, Prof. Asoc. Dr. Majlinda Gjelaj, Prorektore për Zhvillim Institucional, Cilësi dhe Çështje Studentore, vuri në pah rëndësinë e këtij panairi për orientimin profesional të të rinjve:
“Panairi i Karrierës shërben si një platformë konkrete ku studentët mund të informohen, të eksplorojnë fusha të ndryshme dhe të ndërtojnë lidhje të drejtpërdrejta me punëdhënës potencialë.”
Ndërsa z. Agron Dobruna, zëvendësministër në detyrë në Ministrinë e Financave, Punës dhe Transfereve, theksoi rolin kyç të panairit në ndërlidhjen e tregut të punës:
“Ky panair ka krijuar ura të rëndësishme lidhëse mes ofertës dhe kërkesës në tregun e punës, duke sjellë një vlerë të shtuar për ekonominë dhe për të rinjtë.”
Panairi u organizua nga Agjencia e Punës e Republikës së Kosovës dhe Universiteti i Prishtinës “Hasan Prishtina”, në bashkëpunim me Odën Ekonomike Gjermano-Kosovare dhe me mbështetje të Qeverisë Gjermane përmes GIZ (Deutsche Gesellschaft für Internationale Zusammenarbeit) GmbH./Katror.info
