Hiti më i madh i të gjitha kohërave duket se pak nga pak po ndalet…përkohësisht.
U deshën 1 mijë e 852 ditë, që Blinding Lights nga The Weeknd, për herë të parë që prej publikimit në nëntorin e vitit 2019, të dilte nga renditja Globale e Spotify, e cila përmbledh 200 këngët më të dëgjuara në botë çdo ditë, shkruan Albanian Post.
Pra, ky tashmë është një rekord i vendosur me numër të saktë, duke parë se përpara 26 dhjetorit, ditët ende vijonin të numëroheshin.
Mundesh me e lexu edhe…
Por, hyrja në Spotify Global 200 e mbi 120 këngëve me motive Krishtlindje ka bërë që Blinding Lights të dalë nga 200-shja më e mirë, edhe pse kjo mund të jetë vetëm e përkohshme për shkak të sezonit festiv.
Në aplikacionin e njohur muzikor Spotify, është një traditë tashmë që në prag fundviti, të ketë një inflacion me këngë me motive festive, kryesisht ato të Krishtlindjes dhe këngë të caktuara të dalin prej renditjes.
Blinding Lights arriti t’i mbijetonte megjithatë gjashtë sezoneve të tilla në harkun kohor prej publikimit dhe kurrë nuk e la listën, duke shënuar edhe rekordin prej 1 mijë e 852 ditësh.
I shpallur nga prestigjiozja Billboard si “Hiti më i madh në histori”, kënga rrëzoi nga froni Twist-in e famshëm në nëntor 2021, pasi kishte thyer dy vjet nga lëshimi çdo rekord të mundshëm në renditjet amerikane dhe vijonte të shkruante historinë në programet e dëgjimit të muzikës.
Për Abel Tesfaye (në art The Weeknd), ky është thjesht një pikëtakim i radhës me historinë, ndërkohë që përgatitet të hedhë në treg albumin e tij të radhës “Hurry up Tomorrow”, më 24 janar 2025.
Albumi është pjesë e një trilogjie, e cila nisi me After Hours në vitin pandemik 2020, vijoi me Dawn FM dhe do të përmbyllet tashmë me Hurry up Tomorrow.
Me titull të njëjtë, në maj 2025 pritet që Tesfaye të publikojë edhe një film me metrazh të gjatë, protagonistët e të cilit përtej tij, do të jenë edhe Jenna Ortega dhe Barry Keoghan./Katror.info
Përgatiti:
