Ndërsa ndotja mjedisore shpesh shihet në forma të dukshme si plastika në plazhe apo mbeturinat urbane, ekziston edhe një ndotje më pak e dukshme, por po aq shqetësuese.
Në vende të ndryshme të botës, grupe dhe individë po angazhohen për të pastruar zona të fshehura ose të neglizhuara, nga malet dhe detet e deri te shpellat dhe tokat e minuara.
Këto iniciativa, që variojnë nga heqja e infrastrukturës së braktisur deri te pastrimi i zonave të rrezikshme pas konflikteve, po ndihmojnë në rikthimin e natyrës dhe sigurisë për komunitetet përreth, shkruan Positive News, transmeton Katror.info.
Mundesh me e lexu edhe…
Ja disa prej tyre:
1. Çmontimi i resorteve të braktisura të skive
Ngrohja globale ka detyruar shumë resorte skish, veçanërisht ato në lartësi të ulëta, të mbyllen. Por çfarë ndodh me infrastrukturën e tyre të mbetur, si teleferikët, kabllot dhe ndërtesat e braktisura?
Që nga viti 2001, organizata Mountain Wilderness France ka mobilizuar vullnetarë për të çmontuar strukturat e vjetra dhe për të “zhdukur gjurmët njerëzore në natyrë” si pjesë e fushatës së saj për pastrimin e objekteve të papërdorshme. Ajo gjithashtu lobon pranë autoriteteve për të siguruar mbështetje ligjore për këto iniciativa. Deri në vitin 2023, organizata kishte hequr 22 teleferikë në Francë, megjithëse vlerësohet se mbi 100 të tillë vazhdojnë të mbeten në 59 lokacione të ndryshme në vend.
2. Pastrimi i minave tokësore nga zonat e ish-konflikteve
Pas përfundimit të luftërave, shumë toka mbeten të mbushura me mina tokësore dhe eksplozivë të rrezikshëm. Këto mbetje vdekjeprurëse pengojnë rikuperimin e komuniteteve fermerët nuk mund të punojnë tokën, ndërsa familjet kanë frikë të lënë fëmijët të shkojnë në shkollë apo të mbledhin ujë.
The Halo Trust është një organizatë që fuqizon komunitetet vendase për të pastruar tokën e tyre nga minat përmes trajnimeve dhe punësimit, duke i ndihmuar njëkohësisht të rindërtojnë jetën e tyre. Kjo OJQ, e themeluar në Afganistan në vitin 1988, sot ka programe në 30 vende, përfshirë Angolën, Bregun e Fildishtë, Libinë, Kolumbinë dhe Ukrainën.
3. Pastrimi i mbeturinave nga shpellat nëntokësore
Për shekuj me radhë, shpellat karstike të Kroacisë janë përdorur si vende të improvizuara për hedhjen e mbeturinave, duke ndotur burime të rëndësishme të ujërave nëntokësore dhe duke rrezikuar specie unike, përfshirë një lloj molusku të rrallë që ka ekzistuar për më shumë se 65 milionë vjet.
Mossy Earth, një ndërmarrje sociale e bazuar në Mbretërinë e Bashkuar, ka financuar një ekip biologësh dhe zhytësish vendas për të pastruar mbeturinat nga shpella Predolac në jug të Kroacisë dhe për ta rikthyer atë në gjendjen e saj natyrore. Ekipi po bashkëpunon gjithashtu me menaxherin e qendrës së vizitorëve të shpellës për të parandaluar ndotjen në të ardhmen. /Katror.info
Përgatiti:
