Për herë të parë në Kosovë, supervullnetarët e sjellin “Ditën e Solidaritetit” 

Puna vullnetare i ka bashkuar disa të rinj shembullorë që të shtyjnë përpara kauzat në të mirë të komunitetit.

Së fundmi një gjë e tillë po bëhet e mundur nga super vullnetarët e OJQ-së “Toka” e cila për herë të parë në Kosovë po e sjell Ditën e Solidaritetit që do të mbahet me 2, 3, 5 dhe 10 qershor. Ideja e kësaj dite është që të lidhë vullnetarët me biznese e kompani që ua kanë hapur dyert dhe të ardhurat e punës së tyre t’i dhurojnë për të përkrahur fëmijët me nevoja të veçanta dhe shëndetin mendor te të rinjve.

Pas anëtarësimit të organizatës “Toka” në vitin e kaluar në organizatën SAME (Solidarity Action Day Movement) Lëvizja e Ditës së Veprimit të Solidaritetit në Evropë, organizata kosovare vendosi që ta shënojë këtë ditë për herë të parë në mesin tonë.

SAME është rrjeti i organizatave rinore evropiane që  organizojnë një Ditë Solidariteti në vit. Në këtë ditë, nxënësve u jepet mundësia të punojnë në një punë që zgjedhin në vend që të shkojnë në shkollë. Ata i dhurojnë të ardhurat e tyre për projekte të lidhura me të rinjtë nga e gjithë bota.

Nuhi Tërshani koordinator i projekteve në OJQ “Toka” thotë se ideja ka qenë që në Ditën e Solidaritetit të angazhohen rreth 500 vullnetarë.

“Normalisht kjo është varur edhe prej takimeve me bizneset. Bizneset kanë zgjedhur sa vullnetarë duan t’i punësojnë në Ditën e Solidaritetit, mirëpo tragetin ne e kemi pasur veçse të caktuar dhe po shpresoj që rreth atij numri 400 deri në 500 vullnetarë do të jenë të angazhuar në Ditën e Solidaritetit”, thotë ai.

Ndonëse “Dita e Solidaritetit” është vetëm një ditë, disa biznese veçse kanë shprehur gatishmërinë që të ofrojnë punësim për këta vullnetarë.  E një lajm tjetër mbresëlënës është kauza që këta vullnetarë kanë zgjedhur t’i shërbejnë me punën e tyre.

“Këta krejt angazhimin e bëjnë vullnetarisht dhe pagesa e tyre grumbullohet në një fond . E fondi i Ditës së Solidaritetit shpërndahet pastaj për projekte në të mirë të komunitetit. Sivjet i kemi përzgjedhë dy kauza: Shëndeti mendor tek të rinjtë dhe fëmijët me nevoja të veçanta. Por cerfikatat normalisht që do të shpërndahen për vullnetarët me orë të punës vullnetare edhe certifikatat edhe materialet e tjera,” shpjegon Tërshani.

Një prej vullnetareve e cila ka shprehur dëshirë që të mësojë diçka krejtësisht të re përmes “Ditës së Solidaritetit” është Vlera Mulaku, studente e Shkencave Kompjuterike.

“Në ditën që kam aplikuar për Ditën e Solidaritetit, kam aplikuar si vullnetare, pastaj stafi i “Toka” më kanë zgjedhur për të qenë vullnetare në bankën BpB. Pse unë kam menduar që është zgjedhja e duhur për të qenë vullnetare në këtë projekt është se e shoh se ka shumë përfitime prej saj fitoj përvojë të re edhe gjithashtu eksperiencë. Diçka tjetër është se mua më pëlqen gjithë kohën që të bëj shoqëri të re, të njihem me njerëz të rinj me gjëra të reja dhe për këtë po mendoj se është arsyeja e duhur që unë e kam zgjedhur këtë punë”, rrëfen ajo.

Ajo e ka një mesazh për të rinjtë.

“Mendoj se pse njerëzit duhet ta provojnë punën vullnetare është se ju ndihmon shumë në zhvillimin e vetes, i ndihmon dikujt tjetër, dhe është diçka që ju hap rrugë të tjera për jetën në përgjithësi”, porositë Vlera.

Kësaj iniciative i është bashkuar Hallakate që është kompania e parë e rrjeteve sociale në Kosovë.

Kaltrina Jashari, menaxhere e rrjeteve sociale në “Hallakate” thotë se arsyeja pse vendosën t’i bashkangjiten “Ditës së Solidaritetit” qëndron në vetë qëllimin e saj, prandaj e kanë pritur me kënaqësi.

“Është shumë e rëndësishme për neve sepse vazhdimisht hapim konkurse të ndryshme për praktikë që t’i aftësojmë të rinjtë drejt kësaj shkathtësive, drejt shkathtësive të kërkuara në shekullin XXI edhe e kemi parë që është shumë e rëndësishme që të rinjtë të aftësohen në këtë drejtim. Por, përveç kësaj edhe kauza tjetër për të kontribuar për fëmijët me nevoja të veçanta dhe për shëndetin mendor ka qenë prej neve shumë e arsyeshme për shkak se është një temë shumë e ndjeshme dhe një kauzë për të cilën duhet kontribuar më shumë”, thotë ajo.

Kaltrina, edhe vet ka qenë vullnetare në kohë të studimeve dhe atë ia rekomandon secilit. Thotë se jemi pjesë e kësaj shoqërie dhe na takon të kontribuojmë aq sa mundemi.

“Mund të them që ka qenë ndoshta periudha më e mirë e jetës sime për shkak se, ke njohur njerëz të rinj, ke qenë pjesë e grupeve që me shumë njerëz e keni ndarë të njëjtin qëllim të njëjtën kauzë, edhe kohën e lirë e ke kaluar duke përfituar diçka. Ke përfituar do të thotë edhe shkathtësi të reja edhe t’u ka perfeksionu mënyra e komunikimit edhe ke përfituar edhe kontakte të reja. Po pse jo e ke bërë ndoshta punën që e bën edhe sot, por bazën e ke filluar atëherë”, shpjegon ajo.

Dyert i ka hapur për vullnetarët edhe kompania Kutia, kompani e softuerit që zhvillon webaplikacione dhe jep shërbime për klientë.

“Ne besojmë shumë që një iniciativë e tillë ku vullnetarët mund të vijnë dhe ta provojnë një ditë pune në Kutia mund të ndihmojë shumë kjo për shkak se ata mund ta shohin se si është jeta e një programeri, e një projekt menaxheri,  e një HR dhe pse jo ai person mund të krijojë një perspektivë tjetër për pjesën tjetër të jetës dhe kështu mund të ndikojë që ta ketë një karrierë dhe një profesion shumë më të mirë”, thotë Liridona Syla nga kjo organizatë.

Sipas saj, Kutia do t’i angazhojë vullnetarët në departamentin e burimeve njerëzore dhe atë të menaxhmentit të projekteve, duke i futur ata edhe në mbledhjet që mbajnë me klientë për t’i mësuar se si komunikohet dhe cilat janë fazat e zhvillimit të një projekti, poashtu t’i njoftojnë me proceset e rekrutimit dhe të drejtat e punëtorit.

Njëjtë do të veprojë edhe Libraria “Dukagjini”.

Iliriana Hasaj e angazhuar në menaxhimin e eventeve dhe të e-commerce në librarinë “Dukagjini”, thotë se iniciativave që sadopak ndihmojnë aftësimin e të rinjve duhen hapur dyert.

“Sigurisht edhe për librarinë “Dukagjini” të rinjtë e kanë çdoherë si një dëshirë, si një ëndërr që të punojnë në librari të shohin se si funksionon puna këtu, të jenë të rrethuar me libra dhe pse jo në momentin që OJQ “Toka” e ka shprehur dëshirën e saj që të bashkëpunojë me ne, ne kemi qenë të hapur dhe kemi pranuar”, thotë ajo.

Libraria Dukagjini në pikën e saj në Qendër dhe në Prishtina Mall do të akomodojë 30 vullnetarë.

“Vullnetarët do të jenë të angazhuar që ta mësojnë procesin e librarisë, shërbimin, sistemimin e librave, pra se si vijmë ne deri te gjetja e zgjidhjes së kërkesave për klientë sepse anipse duket ndoshta si punë e thjeshtë si çdo vend tjetër ka shumë procese rreth punës se si ne e shërbejmë klientin. Pra, kjo do të jetë e para, kurse ne jemi shumë të hapur dhe të interesuar që ata që ju pëlqen puna në librari, por edhe që tregojnë aftësi që ne pastaj t’i rekrutojmë për punësim më afatgjatë”, thotë ajo.

Të gjithë këta njerëz të vullnetit të mirë e kanë zgjedhur rrugën e vullnetarizmit për të bërë ndryshimet që duan t’i shohin në shoqëri.

Sipas organizatë SAME qëllimi i Ditës së Solidaritetit është të vendosë solidaritet midis të rinjve gjatë viteve të tyre të arsimimit, duke përfshirë të rinjtë e margjinalizuar me më pak mundësi dhe/ose pakicat në mbarë botën. Por kjo është vetëm gjysma e historisë.

Dita e Veprimit të Solidaritetit frymëzon qytetari aktive, zhvillim të udhëhequr nga të rinjtë dhe solidaritet global. Në të njëjtën kohë, është një instrument me ndikim për të siguruar qasje në edukimin politik dhe për të mbledhur para për një kauzë të mirë./Katror.info

Edicionin #9 të plotë e gjeni KËTU 🙂

Kliko këtu dhe bonja Follow/pëlqeje Katror.info për me pa veç Lajme të Mira 🙂