Një iniciativë që kontribuon në mbarëvajtjen e ekosistemit medial në Kosovë, zuri vend në ambientet e Universitetit AAB ku në një panel diskutimi idetë për qëndrueshmëri të mediave, rëndësisë së pluralizmit medial dhe ruajtjes së standardeve profesionale i prezantuan Pierric Judeaux, drejtor i Portofolit dhe anëtar i ekipit themelues të Fondit Ndërkombëtar për Mediat me Interes Publik, Muhamet Jashanica, drejtor ekzekutiv i Katror Media dhe Ariel Shaban nga shoqëria civile.
Moderuar nga Leart Hoxha, kryeredaktor në ATV, para studentëve panelistët prezantuan sfidat nëpër të cilat kalojnë mediat sot, marrë parasysh zhvillimin e hovshëm të teknologjisë, por edhe problemet si dezinformimi përmes rrjeteve sociale si dhe qëndrueshmëria financiare e mediave me interes publik, si tërësi.
Krejt kjo, për të ndikuar sado pak në një klimë më të mirë të punës së mediave dhe shpalosjes së vizionit te gazetarët e ardhshëm, që nesër pritet të jenë emrat e gazetarisë, që me punën e tyre do të duhej të jenë mbrojtësit edhe të punës profesionale, por edhe të demokracisë kosovare.
Mundesh me e lexu edhe…
Judeaux vuri theksin te mundësia e krijimit të një fondi të qëndrueshëm për mediat që janë në interes të publikut.
“Është Fondi i parë Global për mediat e interesit publik në vende me të ardhura të ulëta dhe të mesme. Ne jemi në Azi, në Amerikën Latine, në Afrikë, në Evropën Lindore, gjendemi në 40 shtete, por akoma jo në Kosovë dhe në Ballkanin Perëndimor. Shpresojmë se do të vijmë në të ardhmen, por tani për tani nuk jemi. Ajo që ne bëjmë është se i ofrojmë financa mediave të pavarura, i mbështesim ato që të mbijetojnë dhe të prodhojnë lajme që janë në interes të publikut,” tha Judeaux.
Meti Jashanica, drejtor ekzekutiv i Katror Media, si media unike, që merret me lajme të mira dhe gazetari konstruktive, vuri në pah sfidat me të cilat përballen mediat sot.
“Si media online kemi një ‘luftë’ me dy drejtime. E para punës është algoritmi që kontentin përmbajtësor e shtyn shumë më pak, ose shumë ma vështirë mbërrin te audienca, e që na në njëfarë forme vazhdimisht e kemi këtë betejë në kuptimin që kontenti ynë është gjithmonë profesional dhe me standarde; dhe beteja tjetër, që është pak a shumë financimi i qëndrueshëm i medias sonë. Por, kish me qenë shumë më lehtë për neve, nëse na nuk ishim vetërregullu dhe kishim mundur me shpërnda sa më shumë kontent të paverifikuar. Rasti jonë është rast i mirë ku na vetërregullohemi çdo ditë,” tha Jashanica.
Ariel Shaban, nga shoqëria civile theksoi nevojën për diversifikimin e të hyrave për media, në mënyrë që ato ta ruajnë pavarësinë.
“Është një thënie shumë interesante në marketing, ose më shumë në media sociale: ‘në qoftë se nuk e ke pagu atë përmbajtje që ti je t’u e lexu, ti je përmbajtja’. Paralelja e ngjashme mundet me u bo edhe në media. Në qoftë se ti nuk je t’u pagu për këtë përmbajtje, atëherë mediat janë të detyruara për të marrë fonde prej bizneseve… Dy, në qoftë se mediat sociale janë duke i ndjekur klikimet, ky duket se është model shumë problematik financimi, sidomos për faktin se në Kosovë paguhen shumë më pak sesa jashtë,” tha Shaban.
Kryeredaktori i ATV-së, Leart Hoxha, përshkruajti pak a shumë problemet që rrjetet sociale si koncept kanë shfaqur në raport me mediat, duke potencuar vështirësitë për të depërtuar me gazetari konstruktive te audienca.
“Kemi pasë njerëz në Kosovë që kanë pasur qindra mijëra përcjellës (followers) ama nuk ia kemi ditur zanatin. Kur e ke rrjetin social burim të informimit, këtu krahë më krahë me Festën, jemi ka konkurrojmë edhe Meti me lajme të mira, edhe me një debat politik, edhe kallxo.com me ndonjë aksion të policisë. Dola përtej rolit të moderatorit, për shkak se po e shoh të nevojshme, me ua sqaru pak në çfarë ambienti medial jemi ka funksionojmë,” tha Hoxha.
Nga ky diskutim dolën rekomandimet që duhet krijuar mundësi drejt vetëqëndrueshmërisë financiare, duke marrë për bazë edhe modelet në vende tjera të ngjashme si Kosova dhe me ide të ngjashme, sikur që u prezantua Fondi Ndërkombëtar për Mediat me Interes Publik.
Ky diskutim u organizua nga Partneriteti Evropian për Demokraci në kuadër të Projektit Luftimi i Dezinformimit në Ballkanin Perëndimor./Katror.info
Përgatiti:
