Studiuesit në Qendrën RIKEN për Shkencën e Materialeve të Reja (CEMS) në Japoni kanë zhvilluar një lloj të ri plastike novatore, e cila jo vetëm që është e biodegradueshme, por mund të shpërbëhet plotësisht në ujërat e detit. Kjo plastikë e re është krijuar duke kombinuar dy monomerë jonikë që formojnë lidhje të kryqëzuara me kripë, duke i dhënë materialit forcë dhe fleksibilitet.
Në testet fillestare, studiuesit përdorën një aditiv ushqimor të zakonshëm, ‘heksametafosfatin e natriumit’, i kombinuar me monomerë të bazuar në jone guanidinium, shkruan Zero Carbon Academy.
Të dy përbërësit mund të metabolizohen nga bakteret, duke siguruar që plastika të jetë e biodegradueshme sapo të shpërbëhet në komponentët e saj, transmeton Katror.info.
Mundesh me e lexu edhe…
Eksperimentet treguan se, kur vendosej në tokë, fletët e kësaj plastike shpërbëheshin plotësisht brenda 10 ditëve, duke e pasuruar tokën me fosfor dhe azot, ashtu si një pleh natyral.
Duke përdorur këtë metodë, ekipi i RIKEN arriti të krijojë plastika me shkallë të ndryshme fortësie dhe qëndrueshmërie në tërheqje, me rezultate të krahasueshme ose më të mira se plastikat tradicionale.
Kjo do të thotë se plastika e re mund të personalizohet sipas nevojave – duke krijuar plastikë të fortë dhe rezistente ndaj gërvishtjeve, plastikë elastike të ngjashme me silikonin, plastikë të qëndrueshme për mbajtjen e peshave ose plastikë të butë dhe fleksibile.
Ky material është projektuar si një alternativë e mundshme ndaj plastikave tradicionale, të cilat janë të paqëndrueshme dhe dëmtojnë mjedisin – veçanërisht oqeanet, ku edhe plastikat e ashtuquajtura të ‘biodegradueshme’ si PLA nuk mund të shpërbëhen, sepse janë të patretshme.
Përkundrazi, ato qëndrojnë në ujëra dhe formojnë ‘mikroplastika’, grimca më të vogla se 5 mm, të cilat dëmtojnë faunën detare dhe përfundojnë në zinxhirin ushqimor.
Përparësi të tjera të kësaj plastike janë se është jo-toksike dhe jo e ndezshme, duke mos çliruar emetime të CO2. Gjithashtu, mund të ri-formësohet në temperatura mbi 120°C, ashtu si termoplastikat e tjera.
Lideri i projektit, Tazuko Aida, tha: “Me këtë material të ri, kemi krijuar një familje të re plastikash që janë të forta, të qëndrueshme, të riciklueshme, me funksione të shumta dhe, më e rëndësishmja, nuk krijojnë mikroplastika.”
Bisedimet për traktatin global të plastikës ngecin, pritet të vazhdojnë në 2025
Fatkeqësisht, lajmi pozitiv nga Qendra RIKEN erdhi në të njëjtën javë kur bisedimet për traktatin global të plastikës dështuan të arrijnë një marrëveshje. Takimi i pestë i Komitetit Ndërqeveritar të Negociatave (INC-5) i organizuar nga OKB synonte të arrinte një traktat ligjërisht të detyrueshëm për të trajtuar krizën globale të ndotjes nga plastika.
Bisedimet, që përfshinin mbi 200 vende dhe u zhvilluan në Busan, Koreja e Jugut, ngecën për shkak të mosmarrëveshjeve mbi përfshirjen e kufizimeve në prodhimin e plastikës. Edhe pse në ditën e fundit të takimit u publikua një draft nga presidenca, ai përmbante shumë çështje të pazgjidhura.
Teksti ishte i mbushur me opsione të ndryshme për çështje kyçe si objektivat e detyrueshme për reduktimin e prodhimit të plastikës, rregullimi i kimikateve të dëmshme dhe mbështetja financiare për vendet në zhvillim, për të cilat nuk ishte arritur asnjë konsensus.
Vendet e Jugut Global dhe aktivistët mjedisorë argumentuan se propozimi nuk adresonte shkaqet themelore të ndotjes plastike, ndërsa kritikët e quajtën tekstin të dobët dhe pa ambicie. Më shumë se 100 shtete, përfshirë ishujt e vegjël, vendet afrikane dhe disa vende evropiane, mbështesin një propozim për vendosjen e një objektivi global për reduktimin e prodhimit të plastikës.
Për momentin, delegatët kanë rënë dakord të takohen sërish vitin e ardhshëm për të vazhduar bisedimet, duke bërë që objektivi i OKB-së për të arritur një traktat ligjërisht të detyrueshëm deri në fund të vitit 2024 të mos realizohet. /Katror.info
Përgatiti:
