Edicioni i sivjetëm i PriFest prezanton kategorinë kryesore garuese me filma artistikë të metrazhit të gjatë nga Ballkani, ku gjashtë produksione sjellin histori të forta mbi lirinë, dashurinë dhe identitetin. Përzgjedhja përfshin premierë botërore, rajonale dhe vendore, duke reflektuar energjinë dhe diversitetin e kinemasë së rajonit, shkruan Katror.info.
Mes tyre është “Ngryk” i Ilirjan Himajt, një bashkëprodhim Kosovë-Shqipëri që vjen me premierë botërore dhe trajton kufijtë mes njeriut dhe kafshës në një dramë të mbushur me metafora dhe tension. “Emily” e regjisores Ajola Daja, që vjen nga Shqipëria me premierë rajonale, sjell një rrëfim tronditës mbi dhunën në familje dhe guximin për t’u arratisur drejt një jete të re. Një tjetër prurje është “The Pavilion” i Dino Mustafić, prodhim i përbashkët nga disa vende të Ballkanit, i cili trajton rebelimin e të moshuarve kundër institucioneve dhe autoriteteve.
Në garë hyn edhe “Eternity Package” i regjisores Magdelena Ilieva, një bashkëprodhim Bullgari-Itali që me ton satirik e të errët flet për jetën, vdekjen dhe ironitë e fatit. Filmi “Man of the House” i Andamion Muratajt, bashkëprodhim i gjerë mes Shqipërisë, Italisë, Austrisë, Kroacisë, Kosovës dhe Maqedonisë së Veriut, sjell në ekran historinë e një burrneshe shqiptare dhe dilemat mes traditës dhe ndjenjave njerëzore. Ndërsa “Cycle” i Erkan Tahhuşoğlu, bashkëprodhim Turqi-Kosovë me premierë rajonale, shfaq dramën e pabarazisë sociale dhe dilemat morale që lindin nga ajo.
Mundesh me e lexu edhe…
PriFest do të mbahet nga 9 deri më 14 shtator 2025 në Kino Armata, Prishtinë, duke ofruar një javë të pasur me kinematografi ballkanike dhe ngjarje të veçanta për publikun dhe industrinë e filmit./Katror.info
