Nga 12 deri më 16 mars 2025, kryeqyteti mirëpret edicionin e radhës të “Prishtina Dance Week”, festivalin e parë dhe unik të vallëzimit në Kosovë, duke sjellë ritme, lëvizje dhe kreativitet nga artistë vendas dhe ndërkombëtarë.
Përmes një njoftimi në rrjete sociale, ”Love and Dance Prishtina” ka njoftuar se ky event do të sjellë së bashku artistë, koreografë dhe pasionantë të kërcimit nga e gjithë bota, duke e vendosur Prishtinën në qendër si një hapësirë dinamike dhe të gjallë të artit dhe kulturës.
”Kjo është platforma e parë e këtij lloji në vendin tonë, e cila do të bashkojë vallëtarë nga vendi dhe bota me artist të njohur ndërkombëtarë, duke krijuar një hapësirë për të ndarë pasionin, energjinë dhe kulturën përmes vallëzimit”, thuhet në njoftim.
Mundesh me e lexu edhe…
Çfarë ofron “Prishtina Dance Week 2025”?
Performanca nga artistë vendas dhe ndërkombëtar
Artistë të shquar ndërkombëtarë dhe vendor do të sjellin koreografi të veçanta dhe të punuara me kujdes, duke ofruar momente të jashtëzakonshme për audiencën.
Punëtori krijuese
Gjatë festivalit, artistët do të mbajnë punëtori të ndryshme, ku pjesëmarrësit do të kenë mundësinë të eksplorojnë stile të ndryshme vallëzimi si hip hop, afro, salsa, bachata dhe të tjera. Këto aktivitete do të ofrojnë mundësi për zhvillim të aftësive, duke shtuar energji dhe pasion në çdo hap.
Mbrëmje festive dhe ritme energjike
Katër mbrëmje do të ofrojnë mundësinë për të vallëzuar nën ritmet e muzikës nga zhanre të ndryshme, duke krijuar një atmosferë elektrizuese dhe mundësi për të ndërtuar lidhje mes artistëve dhe pjesëmarrësve.
Për fund, organizatorët e “Prishtina Dance Week 2025” ftojnë të gjithë ata që janë të pasionuar pas vallëzimit dhe artit të lëvizjes, që të bashkohen dhe të krijojnë një eksperiencë të paharrueshme.
“Pavarësisht nëse jeni një valltar profesionist, një artist në zhvillim, apo thjesht një adhurues i ritmit, ky është eventi që nuk mund ta humbisni! Le të festojmë së bashku fuqinë e vallëzimit për të frymëzuar, lidhur dhe transformuar”, u tha në njoftim.
Shkolla e vallëzimit “Love and Dance Prishtina” ka luajtur një rol të rëndësishëm në promovimin dhe zhvillimin e komunitetit të valltarëve në Kosovë, duke ofruar një hapësirë për artistët dhe pasionantët e kërcimit për t’u shprehur dhe zhvilluar aftësitë e tyre në një mjedis mbështetës dhe frymëzues. /Katror.info
Përgatiti:
