Në kuadër të Muajit Rozë, Drejtoria e Shëndetësisë në bashkëpunim me organizatën Action for Mothers and Children (AMC) kanë promovuar Informatorin për Ekzaminimin e Gjirit për Gratë e Kryeqytetit, një material informues që synon të rrisë ndërgjegjësimin dhe të fuqizojë gratë me njohuri të qarta për rëndësinë e kontrollit të rregullt të gjirit, vetëkontrollit dhe qasjes së hershme në shërbimet shëndetësore, raporton Ekonomia Online.
Ky udhëzues, që shpërndahet për herë të parë në nivel komunal, ofron informacione të sakta mbi mënyrën e kryerjes së ekzaminimeve, si dhe mbi vendet ku gratë mund të marrin kujdes të mëtejmë në rast të shqetësimeve apo simptomave të mundshme.
Kryetari i Prishtinës Përparim Rama, theksoi rëndësinë që ky projekt ka për shëndetin publik dhe investimet që janë bërë për gratë e kryeqytetit.
Mundesh me e lexu edhe…
“Shëndeti i nënave, motrave dhe bijave tona është themeli i një shoqërie të shëndetshme e të qëndrueshme. Kemi rritur ndjeshëm përkushtimin dhe ndërgjegjësimin për këtë çështje, duke investuar në infrastrukturë, shërbime dhe fushata sensibilizuese që e vendosin gruan në qendër të kujdesit shëndetësor. Gjatë kësaj periudhe kemi siguruar mamografë të rinj në kryeqytet, duke bërë të mundur që asnjë grua të mos presë për t’u kontrolluar. Shërbimi i mamografisë është plotësisht falas për të gjitha gratë. Gjithashtu, komuna ka subvencionuar të gjitha gratë që përballen me sëmundjen e kancerit. Vetëm gjatë dy viteve të fundit, numri i mamografive të kryera në Prishtinë është rritur me mbi 250 për qind”, tha ai.
Nga ana e tij, Ilir Kurtishi, Drejtor i Klinikës së Onkologjisë, tha se ky informator është një hap konkret drejt zbulimit të hershëm të sëmundjes së gjirit.
“Si QKUK kemi bërë disa hapa konkret në krijimin e këtij informatori. Sot kemi informator i cili duket shumë i theksuar por i cili do të ketë një impakt në zbulimin e hershëm të sëmundjes së gjirit. Kjo është një rezultat i jashtëzakonshëm dhe shpresojmë që kjo të vihet në praktikë sa më shumë. Informatori është i thjeshtë dhe shumë konkret; aty mund të gjeni disa informata se ku të drejtoheni dhe çfarë të bëni”, tha ai.
Rina Demiri Spahija, Drejtore Ekzekutive e Action for Mothers and Children, tha se qëllimi i kësaj nisme është rritja e ndërgjegjësimit dhe orientimi i grave drejt diagnostikimit të hershëm.
“Këtu jemi të gjithë së bashku, na bashkon një kauzë e thjeshtë – që të rrisim ndërgjegjësimin për kancerin e gjirit. Kur një grua sëmuret me kancer të gjirit, atëherë nuk vuan vetëm ajo, vuan gjithë familja, vuan i gjithë rrethi. Për këtë arsye, AMC ka marrë një iniciativë bashkë me Komunën e Prishtinës që të krijojnë një informator të thjeshtë, i cili do t’i tregojë hapat se si një grua duhet të orientohet në mënyrë që ta zbulojë sëmundjen në nivelet më të hershme të saj”, tha ajo.
Ndërsa Drejtoresha e organizatës “Jeta Vita”, Nafije Latifi, theksoi nevojën për vendosjen e pacientit në qendër të sistemit shëndetësor dhe për rritjen e kapaciteteve profesionale në të gjitha komunat.
“Sot përballë jush dua të theksoj një pyetje: a e kemi vendosur pacientin në qendër të sistemit shëndetësor? Ka arritje të shumta pa dyshim që duhet të vlerësohen, por njëkohësisht mbesin ende sfida që kërkojnë zgjidhje të qëndrueshme. Ne besojmë se institucionet do të bëjnë shumë për të siguruar informata për nevojën e kontrolleve me eho dhe mamografi, sepse jemi adresa e parë ku shkon çdo paciente dhe aty duhet ta marrë informacionin nëse nuk ka bërë ose ka bërë kontrolla që të shkojë më tutje. Staf të mjaftueshëm radiologjik në të gjitha komunat, aparaturë të sofistikuar, qasje më të gjerë në barna të avancuara, kushte më dinjitoze dhe më shumë hapësira për trajtim. Plotësim të kapaciteteve me staf të mjaftueshëm sidomos të atij të mesëm dhe krijimin e një qendre të kujdesit paliativ”, tha ajo.
Ky aktivitet u zhvillua në kuadër të fushatës së Muajit Rozë, që synon të kujtojë rëndësinë e diagnostikimit të hershëm të kancerit të gjirit dhe mbështetjen e grave që përballen me këtë sëmundje./EO/Katror.info
