Tenori me famë ndërkombëtare, Rame Lahaj, ka bërë një thirrje të ndjerë publike për sopranon Marigona Qerkezi që t’i bashkohet edicionit të pestë të Festivalit Ndërkombëtar të Operës RLIOF, i cili do të zhvillohet nga 23 korriku deri më 2 gusht 2025 në Prishtinë. Në një postim emocional, Lahaj e fton Qerkezin që ta ndajë fuqinë e zërit të saj me publikun shqiptar dhe të sjellë jehonën e talentit të saj në vendlindje, shkruan Katror.info
“Me fuqinë e zanit tand, dashninë e sinqertë për të qenë afër e mes shqiptarëve; për ta transmetuar atë që ta mësoi nana, si armën ma të fortë e ma fisnike për ta pushtuar botën në skenën e artit të vështirë operistik”, shkruan Lahaj, duke vlerësuar performancën e saj të fundit në Teatrin e Operas dhe Baletit në Tiranë si “brilante” dhe prekëse për të gjithë të pranishmit.
Duke e cilësuar pjesëmarrjen e saj si një detyrë dhe nder për kontributin që i detyrohemi kësaj toke, Lahaj e fton Qerkezin që të jetë pjesë e RLIOF në frymën e temës së këtij viti: “Ëndrra pa kufi, Opera pa mure”. Motoja bart një mesazh të fuqishëm për tejkalimin e barrierave dhe për rolin e artit në ndërtimin e urave kulturore dhe shpirtërore.
Mundesh me e lexu edhe…
“Eja aty ku e kemi obligim kontributin secili prej nesh”, shkruan ai, “sepse kjo tokë na e dha mundësinë me ecë nëpër gjëmbat e saja, e që këto gjëmba, na kalitën që sokaqet e botnave të mos i konsiderojmë si sfida të vështira.”
Thirrja e Rame Lahajt nuk është vetëm një ftesë për bashkëpunim artistik, por një homazh i thellë ndaj rrënjëve, kulturës dhe trashëgimisë shpirtërore shqiptare. Ai e përmbyll me premtimin e përulësisë: “Do të ta puth dorën gjithmonë në shenjë respekti e konsiderate më të lartë për punën, cilësinë, talentin e angazhimin tand profesional!”/Katror.info
