Ambasadori i Gjermanisë në Kosovë, Jorn Rohde, ka kërkuar urgjentisht nga Kosova që të formojë institucionet.
Rohde ka theksuar se politikanët duhet ta kenë shtetin si prioritet, përpara çështjeve partiake.
“Njerëzit e kanë kryer punën e tyre më 9 shkurt dhe tash politikanët duhet ta vendosin shtetin në radhë të parë, ndërsa politikën partiake në të dytën. Pra, mendoj se është urgjentisht e nevojshme që Kosova të formojë institucionet”, ka deklaruar Rohde për mediat në Prishtinë, përcjell Albanian Post.
Mundesh me e lexu edhe…
Ai ka vlerësuar se ngërçi institucional aktual është duke ndikuar negativisht në perceptimin e Kosovës nga jashtë.
“Nuk është puna ime të bëj punën e politikanëve – unë mund vetëm të vëzhgoj – por mund t’ju them me siguri se kjo situatë nuk e përmirëson imazhin e Kosovës jashtë vendit. Nëse nuk ka institucione funksionale, është e vështirë të realizohen detyrat e shtëpisë, sepse mungon fuqia për të marrë vendime të vështira, të cilat janë të domosdoshme tani”.
Kuvendi i Kosovës dështoi të konstituohet për herë të 22-të në seancën e së martës.
Presidentja Vjosa Osmani ka deklaruar se Kosova rrezikon t’i humbasë 900 milionë euro nga Plani i Rritjes së Bashkimit Evropian, për shkak të mosformimit të institucioneve të reja. Në anën tjetër, zëvendëskryeministri Besnik Bislimi ka thënë se, edhe pa këto fonde, buxheti i vendit nuk rrezikohet.
Për gjithë këtë situatë, Bislimi ka fajësuar Komisionin Evropian për miratimin me vonesë të Planit të Rritjes në Këshillin e BE-së, duke thënë se, po të ishin respektuar afatet e paracaktuara, marrëveshja do të ishte ratifikuar dhe do të ishte pranuar tashmë paradhënia.
Në aspektin ekonomik, humbja e miliona eurove nga ky plan do të ndikojë në projekte të mëdha infrastrukturore, do të dëmtojë investimet e huaja dhe do të ketë pasoja për bilancin buxhetor dhe borxhin publik.
Ndërsa në aspektin politik, humbja e këtyre fondeve konsiderohet se do të dëmtonte edhe perspektivën evropiane të Kosovës./AP/Katror.info
