Ylli kosovar Amir Rrahmani po vazhdon të shkëlqejë në futbollin italian dhe evropian. Qendërmbrojtësi i përfaqësueses së Kosovës u shpall kampion i Italisë për herë të dytë me Napolin dhe ishte një nga figurat kyçe në mbrojtjen e hekurt të ekipit të drejtuar nga Antonio Conte.
Forma e tij e lartë dhe paraqitjet e qëndrueshme nuk kanë kaluar pa u vënë re nga institucionet që analizojnë performancat e lojtarëve. Së fundmi, instituti prestigjioz për analiza dhe statistika në futboll, CIES, e ka shpallur Rrahmanin si mbrojtësin më të mirë të vitit në Serie A për sezonin 2024/25.
Aq më tepër, 31-vjeçari nga Prishtina është renditur i katërti në botë, duke lënë pas shumë emra të njohur të futbollit ndërkombëtar dhe duke qenë i vetmi përfaqësues nga kampionati italian që arrin të futet në Top-5.
Mundesh me e lexu edhe…
Sipas CIES, në vlerësimin e tij janë marrë parasysh faktorë të rëndësishëm si loja në ajër, ndërhyrjet, saktësia në pasime, kontrollimi i topit, krijimi i rasteve dhe kontributi në përfundimin e aksioneve.
Në renditjen globale, para Rrahmanit janë pozicionuar vetëm Virgil van Dijk (Liverpool), Aurélien Tchouaméni (Real Madrid) dhe William Saliba (Arsenal).
Sezoni 2024/25 për Rrahmanin ishte mbresëlënës: ai luajti në 39 ndeshje në të gjitha garat, shënoi një gol dhe regjistroi tri asistime – statistika që reflektojnë jo vetëm stabilitet, por edhe ndikim në ndërtimin e lojës dhe ofensivën e ekipit./Katror.info.
