Arti vjen në forma të ndryshme për të na transmetuar ide, emocione dhe mesazhe të caktuara. Prezenca e artit në një vend, simbolizon lirinë, sepse është një formë e shprehjes së lirë që pasqyron ndjenjat dhe emocionet e brendshme të individit.
Arti ia mundëson personit të shprehë atë që ndjen nga brenda, pa kufizime dhe pa pasur nevojë për aprovimin e të tjerëve, thotë një nga artistët që në disa rrugë të Prishtinës sjell mesazhe mbi jetën në Kosovë.
Artisti Qëndrim Gashi (emri i ndryshuar nga redaksia, për shkak të kërkesës së autorit) e solli artin si formë vetëkritike, duke reflektuar realitetin e shoqërisë kosovare. Ai trajtoi shqetësimin e qytetarëve që në periudhën para liberalizimit të vizave ndiheshin të detyruar të largoheshin. Këtë brengë ai e transformoi në një vepër arti, duke e përdorur si thirrje për të mos braktisur Kosovën.
Mundesh me e lexu edhe…
Qëndrimi, i cili me grafitet e tij, transmeton mesazhin mos me ik nga Kosova, ka ndarë me ne një rrëfim mbi artin si dhe për inspirimin e tij, për të krijuar grafitin “RRI, MOS IK” në zonat e caktuara dhe me ngjyrat e veçanta, ai shpreh idenë që hapësirat gri nuk i përkasin një qyteti modern e urban.
“Qyteti, përmes ngjyrave, duhet të ofrojë ngrohtësi dhe një ambient familjar, jo ndjenjë boshllëku,” thotë Qëndrimi në një intervistë pë Katror Media.
Artisti ka theksuar se inspirimi për krijimin e veprave të tij ka ardhur nga brenga që ka pasur lidhur me largimin e të rinjve nga Kosova pas liberalizimit të vizave. Intervistat dhe statistikat që tregojnë se të rinjtë në Kosovë dëshirojnë të lënë vendin për të kërkuar mundësi më të mira, e kanë shtyrë të ndërmarrë veprime. Për këtë arsye, ai ka vendosur të krijojë një grafit si një formë për të komunikuar me publikun dhe për të bërë thirrje që të rinjtë të mos ikin, por të qëndrojnë dhe të kontribuojnë në zhvillimin e Kosovës.
Grafiti, si një formë e shprehjes artistike, është mjeti që ka përdorur arti për të nxitur vetëdijësim dhe reflektim kritik, duke pasqyruar problemet që prekin shoqërinë. Ai shpjegon se shumë herë grafiti i tij ka shkaktuar diskutime dhe reagime të ndryshme, por pikërisht ky është qëllimi: të nxisë reflektim dhe të krijojë një ndërgjegjësim më të thellë për gjendjen e shoqërisë, konsideron Qëndrimi.
Artisti ka theksuar se kjo është një mundësi për të shprehur një kritikë konstruktive ndaj sistemit dhe për të nxitur qytetarët të mendojnë dhe të analizojnë realitetin përreth tyre. Ai ka ndjerë se grafiti është një mjet efektiv për të pasqyruar realitetin dhe për të bërë njerëzit të kuptojnë se ata mund të kontribuojnë në ndihmën e zhvillimit të vendit të tyre.
Një tjetër aspekte që artisti ka përmendur është rëndësia e përdorimit të ngjyrave dhe formave të ndryshme në grafitet e tij. Qëndrimi ka shpjeguar se ngjyrat nuk janë thjesht një zgjedhje estetike, por kanë një ndikim dhe luajnë rol psikologjik në mënyrën se si njerëzit i perceptojnë dhe reagojnë ndaj mesazhit të artit. Për shembull, ai përdor ngjyrën portokalli për të krijuar një kontrast të fortë që tërheq vëmendjen dhe ngjyrën rozë për të krijuar një atmosferë qetësuese, e cila ndihmon për të ndaluar njerëzit që të reflektojnë dhe të kalojnë pa frikë përmes rrugëve që ai ka zgjedhur të krijoj grafite.
Një element tjetër i rëndësishëm që ai ka theksuar është ndikimi që grafiti mund të ketë në identitetin kulturor të një shoqërie. Ai e sheh grafitin si një mjet që mundëson shoqërive të shprehin veten dhe të tregojnë historinë dhe kulturën e tyre. Për më tepër, ai e konsideron grafitin si mundësi për të pasuruar pamjen vizuale të qytetit, duke e bërë atë më të gjallë dhe më të bukur. Si shembull, ai ka përmendur qytetet evropiane si Berlini, ku arti i rrugës ka luajtur një rol të rëndësishëm në transformimin e hapësirave publike në vende me histori të pasur kulturore dhe politike.
Në fund, arti i grafitit për artistin është një formë e fuqishme e kritikës dhe e protestës që shkon përtej shprehjes së një ideje personale, duke nxitur ndryshim në shoqëri. Përmes mesazheve që ai përcjell, dëshiron të bind njerëzit të mos e braktisin Kosovën, por të angazhohen për ta ndihmuar atë të zhvillohet dhe të rritet.
Ai beson se ndryshimi mund të arrihet edhe përmes artit, dhe se çdo formë e shprehjes artistike, përfshirë grafitin, ka potencialin të përçojë një mesazh të fuqishëm dhe pozitiv për shoqërinë.
Grafiti në Kosovë dhe më gjerë ka një rol të rëndësishëm, jo vetëm si një formë arti, por si një mjet i fuqishëm vetëdijësimi dhe shprehjeje kritike. Ai është një mjet i lirisë dhe i shprehjes individuale që mund të nxisë reflektim dhe të sjellë ndryshime të rëndësishme, duke u bërë një thirrje për qytetarët: “Rri dhe kontribuo, sepse Kosova ka nevojë për ty!” /Katror.info
Përgatiti:
