Raporti më i fundit, i përgatitur nga Rrjeti i Grave Gazetare të Kosovës (RrGGK) dhe Asociacioni i Gazetarëve të Kosovës (AGK), sjell në vëmendje sfida si ngacmimet seksuale dhe presionet për të balancuar përgjegjësitë profesionale dhe personale.
“Ndërtimi i një kulture me tolerancë zero ndaj ngacmimeve”, është synimi, siç thotë Getoarba Mulliqi, Drejtoreshë Ekzekutive e Asociacionit të Gazetarëve të Kosovës.
Ajo në një intervistë për Katror Media, ka folur si bashkëautore e raportit to parë të thelluar mbi pozitën dhe sigurinë e grave gazetare në Kosovë, ku si fillim ka theksuar se themelimi i RrGGK-së është një ndër sërë iniciativat që AGK ka themeluar me qëllim të krijimit të një ambienti gjithëpërfshirës për gratë që punojnë në media, për parandalimin e gjuhës seksiste dhe mizogjene në diskursin publik, si dhe ofrimin e një hapësire të sigurt për adresimin e problemeve që hasin në vendin e punës apo gjatë punës në terren.
Mundesh me e lexu edhe…
Raporti i përpiluar nga Getoarba Mulliqi dhe Artiola Babuni, me eksprete nacionale Leonida Molliqajn, u fokusuan në tri çështje kryesore: ngacmimin seksual në punë, sfidat për të balancuar përgjegjësitë profesionale dhe personale, si dhe rreziqet e sigurisë që gratë përjetojnë në punë dhe jashtë redaksive.
‘’Ky raport erdhi si rezultat i shqetësimeve rë vazhdueshme mbi pozitën e grave gazetare në një profesion që shpesh herë nuk ofron mbështetje adekuate. Ngacmimi seksual në vendin e punës dhe sfidat për të balancuar përgjegjësitë profesionale me ato personale janë ndër sfidat më të theksuara, që ndikojnë në performancën dhe mirëqenien e grave në këtë fushë. Angazhimi ynë synon t’i japë zë këtyre përvojave dhe të nxjerrë në pah nevojën për ndryshime strukturore dhe kulturore’’, ka shtuar ajo, derisa thekson se sfida të ngjashme janë evidentuar edhe në raportet e më hershme të AGK-së.
‘’Sipas raportit “Treguesit e Nivelit të Lirisë së Medias dhe Sigurisë së Gazetarëve – Kosova 2023”, të AGK-së, me autore mua dhe Leonita Morinën, ekzistojnë sfida të dukshme në arritjen e barazisë gjinore në pozita menaxheriale brenda dhomave të lajmeve. Raporti thekson se, megjithëse shumica e gazetarëve nëpër media janë gra dhe gjithashtu shumica e anëtarësisë së AGK përbëhet nga gra, kjo nuk reflektohet në drejtimin e mediave, ku burrat vazhdojnë të dominojnë përsa u përket pozitave udhëheqëse. Kjo pabarazi tregon për nevojën e masave konkrete (të cilat po i ndërmarrim me ndihmën e partnerëve dhe donatorëve) për të fuqizuar gratë në role udhëheqëse dhe për të krijuar një ambient më gjithëpërfshirës dhe të barabartë, në media. Përsa i përket përfshierjes në debate televizive, sipas gjetjeve te raportit të lartpërmendur, gratë gazetare nuk ndjehen të nënpërfaqësuara në to për shkak të diakriminimit në baza gjinore, por për shkak se preferojnë të mos përfshihen në to vullnetarisht, kryesisht për shkak të gjuhës dhe formatit’’, ka thënë Mulliqi.
Mulliqi thotë se AGK ka qenë përherë e përkushtuar në promovimin e barazisë gjinore në media. AGK organizon evente, si ndarja e çmimeve me fokus në fuqizimin e grave, si dhe prodhon raportin vjetor, i cili përfshin komponentën e grave me theks të veçantë.
“Përmes aktiviteteve si ndarja e Çmimeve Vjetore në Gazetari, ku janë vlerësuar gazetare për punën e tyre të jashtëzakonshme, çmimeve për fuqizimin e gruas, si dhe të raportimit të drejtë rreth të drejtës së grave në pronë, AGK ka theksuar mbi të gjitha rëndësinë e përfshirjes së grave në të gjitha fushat e gazetarisë, përtej aspekteve që i përkasin barazisë gjinore’’, ka thënë Mulliqi.
Këto angazhime ajo thekson se janë për të siguruar që gratë të kenë një prani të barabartë dhe të dukshme në diskutimet në media dhe në shoqëri, nëpërmjet fuqizimit të tyre dhe krijimit të ambientit më gjithpërfshirës, aty ku ka nevojë.
Sfidat janë të mëdha, por sipas Mulliqit, ekzistojnë zgjidhje dhe mekanizma të cilat e ndërtojnë një hapësirë respektuese të barazisë gjinore, ku në rend të parë thekson edukimin e stafit dhe krijimin e rrjeteve mbështetëse ku gratë mund të ndajnë përvojat e tyre dhe të marrin mbështetje.
‘’Përsa u përket ndryshimeve, në aspektin afatshkurtër, nevojitet miratimi i politikave të brendshme në media që adresojnë barazinë gjinore dhe sigurinë në vendin e punës. Ndërsa ndryshim në periudhë më afatgjatë, janë të domosdoshme ndryshimet e kulturës së përgjithshme në media, duke përfshirë promovimin e grave në pozita udhëheqëse, rritjen e ndërgjegjësimit mbi të drejtat e tyre dhe krijimin e një trupi funksional (ideale do të ishte themelimi i një Sindikate të Punonjësve Medialë) më të fortë që monitoron respektimin e të drejtave të punës për gazetarët”, thekson Mulliqi.
Teksa paraqet zgjidhjet potenciale, ajo thekson gjithashtu edhe rëndësinë e mbështetjes institucionale ndaj grave dhe lehtësimin e raportimit të rasteve, përfshirë edhe organizatat si AGK dhe RrGGK.
‘’E fundit por jo nga rëndësia, ne besojmë se mbështetja për gratë gazetare që përjetojnë kërcënime dhe ngacmime mund të përmirësohet duke ofruar trajnime mbi sigurinë fizike dhe digjitale, qasje më të lehtë në mbrojtje ligjore, dhe krijimi i mekanizmave ku ato mund të raportojnë pa frikë për sulmet dhe ngacmimet me të cilat ato përballen. Institucionet përgjegjëse, përfshirë këtu edhe ne si AGK dhe RrGGK, duhet të vazhdojmë aktivizmin dhe punën për të mbështetur sa më shumë gratë në media, si dhe të kërkojmë përgjegjësi dhe mbështetje më të madhe institucionale dhe përmirësim të mekanizmave ligjorë për adresimin e këtyre rasteve’’, ka përfunduar ajo.
Sipas Mulliqit, prioritet mbetet krijimi i një Sindikate të Punonjësve Medialë që do të monitorojë respektimin e të drejtave të gazetarëve dhe do të sigurojë mbështetje për gratë që përballen me kërcënime apo ngacmime. /Katror.info
Përgatiti:
