Në një kohë kur çmimet e akomodimit po arrijnë nivele rekord dhe qiratë afatshkurtra po ndryshojnë strukturën e komuniteteve, udhëtarët po kërkojnë mënyra të reja dhe më të qëndrueshme për të eksploruar botën.
Një prej këtyre alternativave është shkëmbimi i shtëpive, i cili jo vetëm ul kostot, por edhe krijon një përvojë më autentike dhe të ndërsjellë mes udhëtarëve.
Platforma si Kindred dhe HomeExchange po i japin një dimension të ri këtij koncepti, duke i kthyer shtëpitë e zakonshme në hapësira mikpritëse për aventurierët globalë.
Mundesh me e lexu edhe…
Me rritjen e rregulloreve mbi qiratë afatshkurtra dhe shqetësimet për mbingarkesën turistike, shkëmbimi i shtëpive mund të jetë një zgjidhje e qëndrueshme për të ardhmen e udhëtimit, shkruan CNN, transmeton Katror.info.
Lauren Shaw e dashuron udhëtimin. Por ta nxjerrë banesën e saj me qira? Aspak.
“Nuk jam ndier kurrë rehat ta listoj apartamentin tonë në një platformë qiraje,” thotë ajo.
“Kam pasur miq që kanë përjetuar përvoja të tmerrshme me mysafirët dhe mbështetje pothuajse të papërfillshme nga ekipi i shërbimit të platformës së rezervimeve”, tha ajo.
Pastaj është edhe kostoja. Shaw, nga Nju Jorku, e adhuron skijimin një pasion që kushton shumë dhe që ka parë rritje të jashtëzakonshme të çmimeve të akomodimit me bum-in e qirave afatshkurtra gjatë dekadës së fundit.
“Akomodimi në qendrat e skijimit është shpesh shumë i shtrenjtë dhe i papërballueshëm,” thotë ajo.
Në vend të kësaj, Shaw dhe partneri i saj iu drejtuan shkëmbimit të shtëpive për të realizuar ëndrrat e tyre të udhëtimit.
“Na pëlqen shumë të udhëtojmë dhe kjo na ka dhënë mundësinë ta bëjmë edhe më shpesh, pasi akomodimi është zakonisht pjesa më e kushtueshme e një udhëtimi,” thotë ajo.
“Meqë duhet të lejoni njerëzit të qëndrojnë në shtëpinë tuaj për të qëndruar në të tyren, ekziston më shumë përgjegjësi për ta trajtuar hapësirën ashtu siç do të dëshironit që dikush tjetër ta trajtonte tuajën”, thekson ajo.
Një mënyrë e re për të bërë biznes
Shaw është anëtare e Kindred, një prej platformave të shumta të shkëmbimit të shtëpive që u mundësojnë përdoruesve të udhëtojnë me më pak shpenzime.
Përveç uljes së kostove, shërbime të tilla ndihmojnë gjithashtu në lehtësimin e shqetësimeve të vazhdueshme rreth mbioveriturizmit dhe rritjes së qirave, të cilat po i detyrojnë banorët vendas të largohen nga komunitetet e tyre.
“Më shumë se 90% e shtëpive tona janë rezidenca të mirëfillta të anëtarëve pritës dhe shumicën e vitit ata jetojnë aty,” shpjegon Justine Palefsky, bashkëthemeluese e Kindred.
“Anëtarët shkëmbejnë netët e qëndrimit, jo para, kështu që nuk ka mënyrë për të blerë ose shitur netë qëndrimi në Kindred me para të gatshme”, shton ajo.
Kindred u lançua në vitin 2022 dhe tani numëron 75,000 anëtarë në 150 qytete të Shteteve të Bashkuara, Kanadasë, Meksikës dhe Evropës Perëndimore. Regjistrimi në Kindred është falas, pa pagesë anëtarësimi.
“Pritësit nuk fitojnë të ardhura duke mirëpritur mysafirë; ata thjesht fitojnë mundësinë për të qëndruar në shtëpinë e dikujt tjetër në një moment tjetër”, tha ajo.
Përdoruesit paguajnë vetëm një tarifë prej 15 deri në 35 dollarë për natë ndaj kompanisë kur qëndrojnë në shtëpinë e dikujt tjetër, si dhe mbulojnë kostot e pastrimit në fund të qëndrimit të tyre.
Palefsky thotë se kjo është afërsisht një e dhjeta e kostos së një qiraje afatshkurtër.
Ndikimi i qirave afatshkurtra në komunitetet lokale është diçka për të cilën ajo është shumë e vetëdijshme.
“Ajo që ishte me të vërtetë e rëndësishme për ne ishte krijimi i një sistemi që kishte një ndikim më të ndërgjegjshëm në qytetet tona. U rrita në San Francisko, një qytet me kosto shumë të lartë, duke parë përreth dhe duke menduar, ‘Uau, si do të mund ta përballoj të njëjtën mënyrë jetese si prindërit e mi?’”, shton ajo.
Ky është një shqetësim që po shfaqet në qytete anembanë botës. Airbnb, në veçanti, është përballur me kritika dhe presion të shtuar rregullator, pasi drejtuesit e qyteteve po përpiqen t’i japin fund qirave tejet të larta, të nxitura nga përdorimi i apartamenteve për turistë në vend të banorëve lokalë. Po ashtu, qiratë afatshkurtra ndryshojnë strukturën e një vendi, duke larguar bizneset e vogla, të cilat shpesh nuk janë të nevojshme për vizitorët.
Që nga nëntori i vitit 2023, Ligji Lokal 18 i qytetit të Nju Jorkut ka ndaluar përdoruesit e Airbnb të japin me qira të gjithë apartamentin e tyre. Ata që e përdorin këtë shërbim mund të japin me qira vetëm hapësira ndërsa janë të pranishëm vetë në apartament dhe duhet gjithashtu të regjistrohen në qytet. Ata që nuk e respektojnë këtë ligj, rrezikojnë gjoba prej mijëra dollarësh.
Ndërkohë, Barcelona ka në plan të ndalojë plotësisht qiratë afatshkurtra deri në vitin 2028, pas protestave në rrugë për mbipopullimin turistik dhe një reagim të ashpër kundër atyre që përdorin këto shërbime.
“Gjithçka mund të ndahet”
Përtej çështjeve financiare dhe ndikimit të turizmit në ekonomi, shkëmbimi i shtëpive sjell një koncept më të thellë të udhëtimit.
“Premtimi fillestar i Airbnb ishte se gjithçka mund të jepet me qira, madje edhe pasuria juaj më e çmuar,” thotë Emmanuel Arnaud, CEO i HomeExchange. Kjo platformë ka ekzistuar për më shumë se 30 vjet, fillimisht si një katalog fizik përpara se të kalonte online. Sot ka mbi 200,000 anëtarë në 150 vende. Vetëm në tre vitet e fundit ka pasur një rritje prej 50% në vit, me më shumë se 460,000 shkëmbime në 2024. Shumë njerëz e njohin atë falë filmit The Holiday, ku personazhet e interpretuar nga Cameron Diaz dhe Kate Winslet shkëmbejnë shtëpitë dhe jetët e tyre, duke gjetur dashurinë përgjatë rrugës.
“Premtimi ynë është i kundërt: Gjithçka mund të ndahet. Ekziston një botë tjetër e mundshme, e cila nuk bazohet domosdoshmërisht te paratë. Edhe pasuria juaj më e rëndësishme, shtëpia juaj, mund të ndahet. Dhe nëse e ndajmë, mund të hapim mundësi të jashtëzakonshme udhëtimi,” shton Arnaud.
HomeExchange funksionon ndryshe nga Kindred. Përdoruesit paguajnë një tarifë fikse prej 220 dollarësh në vit për një numër të pakufizuar shkëmbimesh. Parimi mbetet i njëjtë: udhëtimi mund të jetë më i përballueshëm dhe të krijojë lidhje më të thella nëse e shohim përtej përfitimeve financiare nga shtëpitë tona.
“Duke eliminuar pagesën e drejtpërdrejtë mes dy personave, marrëdhënia mes anëtarëve është krejt ndryshe. Ata bëhen dy të barabartë që kontribuojnë njësoj, që lidhen si njerëz para se të qëndrojnë në shtëpitë e njëri-tjetrit dhe vendosin të kenë besim,” shpjegon Palefsky.
“Kam kaluar shumicën e karrierës sime në sektorin e teknologjisë dhe e lashë me dëshirën për të krijuar diçka më domethënëse përdorimin e teknologjisë për të lidhur njerëzit me botën, për t’i ndihmuar ata të krijojnë marrëdhënie më të pasura dhe më njerëzore,” shton ajo.
Një zgjidhje për mbioveriturizmin?
Sigurisht, përdoruesit e këtyre platformave duhet të bëjnë më shumë përpjekje, duke u lidhur me shkëmbyesit e mundshëm përmes thirrjeve me video dhe duke u siguruar që janë përshtatja e duhur për njëri-tjetrin. Përfitimi, megjithatë, është një përvojë më e thellë dhe më kuptimplotë për të dyja palët.
“Takimi me njerëz që me të vërtetë duan të ndajnë hapësirën e tyre dhe t’i bëjnë të tjerët të ndihen të mirëpritur është freskues. Ky shpirt bujarie dhe lidhjeje rezonon me mua,” thotë Esmond Fountain, tregimtar dhe komedian nga Nju Jorku.
Fountain madje mori pjesë në një takim të përdoruesve të Kindred dhe, si rezultat, bëri udhëtimin e tij të parë jashtë vendit në Londër së bashku me një mik që e kishte njohur gjatë ngjarjes.
“Nuk ka të bëjë vetëm me udhëtimin me kosto të ulët; ndjenja e komunitetit ka bërë një ndryshim të madh në jetën time,” thotë ai.
Barbara, një përdoruese e HomeExchange që nuk dëshiron të ndajë mbiemrin për arsye privatësie, e mbështet këtë mendim:
“Jeta ime është pasuruar shumë nga shkëmbimi i shtëpive. Kam miq në mbarë botën. Kam vizituar vende që kurrë nuk e kisha menduar të mundshme dhe kam mësuar si jetojnë njerëzit e zakonshëm.”
Këto histori personale sugjerojnë se ekziston një interes në rritje për këtë mënyrë udhëtimi, veçanërisht mes atyre që kërkojnë lidhje më të thella njerëzore. Për politikëbërësit, nëse jo për pronarët e hoteleve dhe zhvilluesit e pasurive të paluajtshme, shkëmbimi i shtëpive mund të sjellë ndryshime pozitive në turizëm.
“Nëse 100% e njerëzve që përdorin qiratë afatshkurtra do të përdornin shkëmbimin e shtëpive, atëherë nuk do të kishte mbioveriturizëm, sepse numri i njësive të disponueshme do të ishte i barabartë me numrin e banorëve që jetojnë aty,” shpjegon Arnaud. “Pra, nëse ka mjaft njerëz që banojnë aty, ne nuk po shtojmë më shumë vizitorë dhe nuk po rrisim popullsinë e përgjithshme.”
Për qytete si Barcelona dhe Nju Jorku, një ndryshim i tillë mund të jetë një zgjidhje për një problem që prej kohësh duket i pazgjidhshëm. /Katror.info
Përgatiti:
