Në panairin prestigjioz European Coatings Show 2025, të mbajtur nga 25 deri më 27 mars në Nuremberg, Gjermani, industria kimike u njoh me një produkt inovativ që premton të sjellë ndryshime të mëdha në sektorin e ndërtimit dhe veshjeve industriale.
Baxxodur EC 151, një ngurtësues revolucionar për rrëshirat epokside, u prezantua nga dy gjigantët e industrisë kimike, BASF dhe Sika, duke sjellë risi të rëndësishme si ulja e emetimeve të dëmshme (VOC), aplikimi më i lehtë dhe qëndrueshmëri e lartë.
Në qendër të këtij suksesi qëndron Edis Kasëmi, shkencëtari i mirënjohur nga Prizreni, i cili ka udhëhequr projektin e zhvillimit të këtij produkti si pjesë e Sika Technology AG në Cyrih. Duke përdorur teknika të avancuara të dizajnit molekular dhe sintezës inovative, ekipi i tij ka arritur të krijojë një formulë të re që pritet të ndikojë ndjeshëm në performancën dhe qëndrueshmërinë e materialeve kompozite, sektorin e ndërtimit dhe veshjeve industriale.
Mundesh me e lexu edhe…
Ky inovacion është i mbrojtur nga më shumë se 30 patenta, duke konfirmuar rëndësinë e tij në fushën e kimisë dhe duke e pozicionuar Kasëmin dhe ekipin e tij në pararojë të kërkimit dhe zhvillimit në këtë industri.
Kjo arritje shënon një sukses të rëndësishëm jo vetëm për Prizrenin dhe Kosovën, por edhe për komunitetin shkencor shqiptar, duke reflektuar kontributin dhe potencialin e inovacionit në nivel ndërkombëtar.
Sika është një kompani e specializuar në kimikate me një pozicion udhëheqës global në zhvillimin dhe prodhimin e sistemeve dhe produkteve për ngjitjen, izolimin, amortizimin, përforcimin dhe mbrojtjen në sektorin e ndërtimit dhe industri.
Sika ka degë në 102 vende të botës dhe në mbi 400 fabrika prodhon teknologji inovative për klientët globalë. Përmes kësaj, ajo luan një rol kyç në transformimin e industrisë së ndërtimit dhe transportit drejt një qasjeje më miqësore ndaj mjedisit.
Në anën tjetër BASF është një nga kompanitë kryesore kimike në botë, e njohur për inovacionet e saj në fusha të ndryshme të industrisë. Me një histori mbi 150-vjeçare, BASF fokusohet në krijimin e zgjidhjeve të qëndrueshme që mbështesin transformimin e gjelbër në sektorë si ndërtimi, bujqësia, energjia dhe transporti.
Përmes hulumtimit dhe zhvillimit të teknologjive të reja, kompania synon të ulë ndikimin mjedisor të produkteve kimike, duke ruajtur një ekuilibër mes suksesit ekonomik, mbrojtjes së ambientit dhe përgjegjësisë sociale. /Katror.info
Përgatiti:
