Nga transporti i drejtuar nga inteligjenca artificiale deri te jeta pa para në dorë, pesë qendrat më të mëdha urbane në botë udhëheqin listën e Global Innovation Index 2025 (Indeksi Global i Inovacionit), falë teknologjisë së përparuar dhe zgjidhjeve të tyre të mençura për jetën e përditshme.
Sipas raportit vjetor të Organizatës Botërore të Pronësisë Intelektuale (WIPO), këto metropole kryesojnë botën në investime, patenta, adoptim teknologjik dhe ndikim socio-ekonomik, duke përfaqësuar mbi 70% të aktivitetit global të kapitalit sipërmarrës dhe të patentave.
Shenzhen – Hong Kong – Guangzhou (Kinë)
Mundesh me e lexu edhe…
Kina është përfshirë për herë të parë në dhjetëshen më të mirë të indeksit, falë rritjes së shpejtë të patentave, investimeve shkencore dhe kapitalit të riskut. Rajoni jugor, që përfshin Shenzhen, Hong Kong dhe Guangzhou, është renditur i pari në botë.
Në këtë zonë, teknologjia është pjesë e çdo aspekti të jetës. Në tregjet e Hong Kongut, shitësit pranojnë pagesa me QR code pranë tabelave me çmime të shkruara me dorë, ndërsa bizneset e vogla menaxhojnë porositë përmes disa aplikacioneve.
Karta Octopus, e krijuar fillimisht për transport publik, sot përdoret për çdo gjë – nga automatet deri te parkimet.
Në mbrëmje, vizitorët mund të udhëtojnë me Star Ferry për të parë spektaklin Symphony of Lights, ku më shumë se 43 ndërtesa ndriçohen me drita LED të sinkronizuara me muzikë.
Në Shenzhen, qendra e kompanive gjigante si Huawei dhe Tencent, krijimtaria mbështetet nga hapësira si OCT Loft apo Shenzhen Open Innovation Lab, ku qytetarët kanë qasje në pajisje të avancuara si realiteti virtual.
Këtu zhvillohen edhe shfaqje dronësh spektakolare – qyteti ka thyer rekordin botëror me 12 mijë dronë të përdorur në një shfaqje të vetme.
Tokio – Yokohama (Japoni)
Zona metropolitane Tokio-Yokohama mban vendin e dytë dhe prodhon më shumë se 10% të patentave ndërkombëtare në botë. Por për banorët, teknologjia është praktike, e dobishme dhe njerëzore.
Nga kartat e transportit që përdoren për autobusë e shitës automatikë te sensorët me inteligjencë artificiale në markete, gjithçka është ndërtuar për lehtësi.
Vizitorët mund të përjetojnë këtë përparim në Henn na Hotel, ku check-in bëhet nga robotë, ndërsa “shtratet inteligjente” rregullojnë temperaturën për gjumë optimal. Në linjën automatike Yurikamome, trenat pa shofer ofrojnë pamje panoramike të Tokios dhe urës “Rainbow Bridge”.
Ndërkohë, galeria teamLab Planets ofron një përvojë arti interaktive, ku drita dhe tingulli reagojnë ndaj lëvizjeve të vizitorëve.
San Jose – San Francisco (SHBA)
E njohur si Silicon Valley, kjo zonë përqendron 7% të marrëveshjeve të kapitalit sipërmarrës në botë dhe ka aktivitetin më të dendur të inovacionit për banor.
Sipas Ritesh Patel, themelues i kompanisë “Ticket Fairy”, San Francisco është “në pragun e një epoke të re, si koha e bumit të parë të internetit”.
Këtu mund të testosh teknologjitë më të fundit para se të shfaqen në pjesën tjetër të botës, si makinat autonome Waymo, që tashmë përdoren gjerësisht për transport publik.
Pekin (Kinë)
Pekini ka renditjen më të lartë në botë për prodhimin shkencor, duke kontribuar me 4% të artikujve shkencorë globalë. Por fuqia e tij qëndron në balancën mes inovacionit dhe trashëgimisë kulturore.
Jeta e përditshme mbështetet në super-aplikacione si Alipay dhe WeChat, që përfshijnë përkthim automatik, pagesa me QR code dhe porosi ushqimore.
Vizitorët mund të provojnë robo-taksitë autonome të Baidu Apollo, pa timon, që lëvizin tërësisht me autopilot – një përvojë futuriste dhe e sigurt.
Seul (Kore e Jugut)
Kryeqyteti korean zë vendin e pestë, duke përfaqësuar 5.4% të patentave globale dhe duke udhëhequr Azinë për marrëveshje kapitali sipërmarrës.
Në jetën e përditshme, dyert hapen me kode digjitale, pagesat bëhen vetëm me telefon, dhe marketet pa arka funksionojnë 24 orë me sistem AI që monitoron stoqet dhe parandalon vjedhjet.
Në qendër të qytetit, Cheonggyecheon Stream është shembulli më i mirë i dizajnit inteligjent – një zonë këmbësorësh me autobusë elektrikë autonomë që ndalen sipas kërkesës. /AP/Katror.info
