Një nga prirjet më të veçanta të këtij viti në botën e stilit të jetesës është “dopamine decor”, një qasje dekorimi që synon të nxisë ndjesinë e lumturisë përmes ngjyrave të gjalla, formave lozonjare dhe objekteve që sjellin ngushëllim emocional.
Në vend që të ndjekë rregullat klasike të dizajnit, “dopamine decor” fokusohet tek ndjesitë që të përcjell hapësira jote personale.
Sipas psikologjisë së ngjyrave nuancat si: portokalli, e verdhë, rozë dhe e nuanca e kaltër e hapur stimulojnë prodhimin e hormoneve që përmirësojnë humorin.
Mundesh me e lexu edhe…
Kjo qasje kreative u jep individëve lirinë të personalizojnë ambientin e tyre me elemente që pasqyrojnë gëzimin e brendshëm – si piktura të ndezura, kolltukë me forma të rrumbullakëta, vazo të pazakonta apo ndriçim dekorativ që krijon një atmosferë lozonjare dhe të ngrohtë.
“Dopamine decor” është shumë më tepër se një trend estetik – është një mënyrë vetë-shprehjeje dhe një formë e vogël terapie.
Një mur i mbushur me postera filmash nga fëmijëria, apo një raft librash me kopertina shumëngjyrëshe, mund të sjellë çdo ditë një ndjesi të ngrohtë dhe pozitive.
Ky stil ka fituar popullaritet edhe në rrjetet sociale, ku dizajnerë të brendshëm inkurajojnë ndjekësit të lënë mënjanë nuancat neutrale dhe të guxojnë të krijojnë hapësira që reflektojnë lumturinë e tyre personale.
Në vende si Koreja e Jugut, Shtetet e Bashkuara dhe Franca, madje janë hapur dyqane të specializuara që ofrojnë produkte që kanë në qendër “lumturinë në shtëpi”.
Në një botë gjithnjë e më të zhurmshme e të ndërlikuar, “dopamine decor” është një mënyrë për ta kthyer shtëpinë në një strehë të ndjenjave pozitive.
Në fund të fundit, nuk ka kënaqësi më të madhe se të jetosh në një ambient që të mirëpret dhe të bën të buzëqeshësh çdo ditë. /Katror.info
Përgatiti:
