Sopranoja e njohur kosovare Besa Llugiqi do të ngjitet sonte në skenën magjike të Fortezza Vecchia, ku do të jetë pjesë e Mascagni Festival, një nga ngjarjet më prestigjioze të muzikës lirike në Itali, shkruan Katror.info.
Në këtë edicion, publiku do të ketë mundësi të ndjekë shfaqjen “Gratë e Mascagnit”, një rrëfim intim dhe teatror mbi jetën e kompozitorit të madh italian Pietro Mascagni, të ndërtuar mbi librin e Francesca Albertini Mascagni (Ed. Curci). Ky projekt ndërthur biografinë me imagjinatën, historinë me ndjenjat, duke sjellë në skenë zërat e nënave, vajzave, muzave dhe dashurive që e kanë shoqëruar atë.
Shfaqja do të realizohet nga Vertigo Teatro Company, me regji të Marco Conte dhe dramë të shkruar nga Marco Voleri. Muzika do të interpretohet nga Orkestra e Teatrit Goldoni, nën dirigjimin e mjeshtrit Jure Bučević, ndërsa me performancat e tyre vokale do të ngjallin emocion sopranoja Besa Llugiqi dhe tenori i famshëm italian Dario Di Vietri.
Mundesh me e lexu edhe…
Ky homazh polifonik që bashkon teatrin, kujtesën dhe muzikën do të mbahet në Fortezza Vecchia, Livorno, sonte më 8 shtator, në ora 21:30.
Ngjarja realizohet nga Mascagni Festival Production në bashkëpunim me Opera Music Management./Katror.info
