Organizata e pavarur, jo-qeveritare, SOS Fshatrat e Fëmijëve të Kosovës, ka pranuar donacion një parcelë toke nga donatori, Artan Hasani.
Këtë e ka bërë të ditur vetë organizata përmes një postimi në Facebook, ku veprimi në fjalë është konsideruar jo vetëm si vlerë materiale, por mbi të gjitha edhe ndjenjë e qëndrueshmërisë dhe solidaritetit.
”Një histori e pabesueshme e dashurisë dhe përkushtimit ndaj kauzës që asnjë fëmijë të mos rritet i vetëm është shkruar nga një njeri i veçantë, miku i SOS Fshatit, Artan Hasani . Ai, një punëtor, prind i përkushtuar dhe mbështetës i atyre që kanë nevojë, ka treguar anën e tij solidare, duke bërë një dhurim jashtëzakonisht të veçantë, një parcelë toke për fëmijët e SOS Fshatit Ky donacion është i veçantë jo vetëm për shkak të vlerës materiale të parcelës së tokës, por mbi të gjitha për ndjenjën e qëndrueshmërisë që sjell me vete. Artani ka kuptuar se jeta nuk është vetëm për të marrë, por edhe për të dhënë, për të ndarë dhe për të ndihmuar ata që kanë më shumë nevojë”, thuhet në njoftimin e SOS Fshatit, në Facebook.
Mundesh me e lexu edhe…
Organizimi i punës së SOS Fshatrave, fokusohet në fëmijët e braktisur, të varfër dhe jetimë, fëmijët që kanë nevojë për një familje kujdestare për fëmijë. Miliona fëmijë në mbarë botën janë duke jetuar pa familjet e tyre biologjike, për një sërë arsyesh, duke përfshirë: ndarjen prindërore, dhuna në familje dhe neglizhimi. Ata kanë humbur prindërit e tyre për shkak të luftës apo katastrofave natyrore, sëmundjeve etj.
Ndërsa tutje në njoftimin e SOS Fshatrave, thuhet se me këtë parcelë do të mund të ndërtohet një shtëpi pushimi për fëmijët.
”Fëmijët e SOS Fshatit tashmë e kanë në zemër pushimin dimëror dhe veror, por me këtë parcelë të dhuruar nga Artani, ata do të kenë një shtëpi pushimi të veçantë për familjet e tyre. Megjithatë, rruga për të arritur këtë ëndërr është ende e vështirë. Planifikimi arkitekturor, ndërtimi dhe mobilimi janë sfidat e ardhshme që duhet të përballen. Por me solidaritetin dhe mbështetjen e miqve, mund të të ndërtojmë një shtëpi pushimi që do të mbetet një vend i magjishëm për fëmijët e SOS Fshatit”, thuhet tutje në njoftimin e Organizatës.
SOS Fshatrat e Fëmijëve është një organizatë e pavarur, jo-qeveritare ndërkombëtare e cila ka punuar gjatë kohë me qëllim të përmbushjes së nevojave dhe mbrojtjes së interesave dhe të drejtave të fëmijëve që nga viti 1949. Ajo u themelua nga Herman Gmeiner në Imst, Austri. /Katror.info
Përgatiti:
