Federata e Hendbollit e Kosovës ka përfunduar të gjitha përgatitjet për fillimin e turneut prestigjioz IHF Trophy 2025 për zonën evropiane. Ky kampionat do të shfaqë talentet më të mira të grupmoshave U18 dhe U20 në hendboll, duke u zhvilluar në Pallatin e Rinisë dhe Sportit në Prishtinë.
Te të rinjtë (U18), shtatë ekipet kombëtare janë ndarë në dy grupe. Në grupin A garojnë Gjeorgjia, Britania e Madhe, Qipro dhe Shqipëria, ndërsa në grupin B janë Bullgaria, Kosova dhe Moldavia.
Turneu nis sot me tri ndeshje interesante. Ndeshja e parë zhvillohet sot në orën 11:00, ku përballen Gjeorgjia dhe Qipro. Në orën 13:00 do të takohen Britania e Madhe dhe Shqipëria, ndërsa ndeshja e fundit e ditës, Kosova kundër Moldavisë, është caktuar për në orën 17:00. Hapja zyrtare e kampionatit do të mbahet në orën 16:45, menjëherë para përballjes së Kosovës.
Mundesh me e lexu edhe…
Te juniorët (U20), katër kombëtaret pjesëmarrëse janë në një grup të vetëm: Bullgaria, Qipro, Britania e Madhe dhe Kosova. Të martën, më 15:00, do të zhvillohet ndeshja mes Bullgarisë dhe Britanisë së Madhe, ndërsa po atë ditë, në orën 19:00, Qipro përballet me Kosovën.
Ky turne shërben si fazë kualifikuese për Kampionatin Botëror. Fituesit e grupmoshave U18 dhe U20 do të sigurojnë një vend në fazën ndërkontinentale të IHF Trophy. Kombëtaret që triumfojnë në këtë fazë do të marrin pjesë në Kampionatin Botëror, një ëndërr për çdo ekip pjesëmarrës.
Federata e Hendbollit e Kosovës ka treguar përkushtim maksimal për të garantuar një organizim dinjitoz, duke pritur ekipe nga e gjithë Evropa dhe duke ofruar kushte optimale për garuesit dhe tifozët. Hendbolli kosovar ka mundësinë të shkëlqejë, ndërsa Kosova luan rolin e nikoqirit të një turneu të rëndësishëm ndërkombëtar./Katror.info
Përgatiti:
