Superliga e Kosovës në futboll rikthehet këtë fundjavë me xhiron e dhjetë, e cila pritet të sjellë duele mjaft interesante në garën për kreun dhe mbijetesë.
Tri ndeshje do të luhen të shtunën, ndërsa dy të tjerat janë paraparë për të dielën.
Në njërën nga përballjet më interesante të javës, Ballkani pret Gjilanin në stadiumin e qytetit në Suharekë. “Portokallezinjtë” hyjnë në këtë sfidë pas fitores 2-0 ndaj Dukagjinit, ndërsa edhe Gjilani vjen me moral të ngritur pas triumfit minimal ndaj Prishtinës së Re, në debutimin e trajnerit të ri, Debatik Curri. Në ndeshjen e parë mes tyre këtë edicion, skuadrat ndanë pikët me rezultat 1-1.
Mundesh me e lexu edhe…
Ndërkohë, Prishtina e Re e pret Malishevën në “Sami Kelmendi” të Lipjanit. Debutuesja në elitë renditet e fundit në tabelë dhe ka vetëm një fitore – pikërisht ndaj Malishevës në xhiron e parë të kampionatit. Pas atij suksesi, ekipi kryeqytetas ka grumbulluar vetëm katër pikë në tetë ndeshjet e radhës. Nga ana tjetër, Malisheva ka pësuar dy humbje radhazi, përfshirë edhe atë të fundit ndaj Dritës.
Nën dritën e reflektorëve në “Fadil Vokrri”, Prishtina do të përballet me Dukagjinin, në një duel që pritet të tërheqë shumë vëmendje. Kryeqytetasit janë në formë të shkëlqyer me pesë fitore radhazi, duke kryesuar tabelën me 22 pikë. E fundit fitore e tyre erdhi në ndeshjen dramatike ndaj Drenicës në Skënderaj (4-3).
Skuadra e Ismet Munishit, në anën tjetër, pas një nisjeje të fortë me 13 pikë në gjashtë ndeshjet e para, nuk ka shijuar fitore në tri javët e fundit, duke regjistruar një barazim dhe dy humbje. Në takimin e parë mes dy skuadrave këtë sezon, Prishtina doli fituese 3-2 në Klinë.
Aktualisht, Prishtina kryeson me 22 pikë, katër më shumë se Ballkani që ndodhet në pozitën e dytë. Dukagjini dhe Drita ndajnë vendet tre dhe katër me nga 14 pikë secila, shkruan RTKlive.
Në zonën e rrezikut gjendet Gjilani me 10 pikë, aq sa ka edhe Ferizaj, ndërsa në fund të renditjes mbetet Prishtina e Re me vetëm shtatë pikë./Katror.info
