Edhe një ”Monday Marks” për këtë fundjavë nga Suzanne Podcast, me rekomandime me ngjarje në Kosovë dhe në Shqipni, se çka me këqyr e çka me lexu fresh.
Fundi i janarit osht tradicionalisht koxha i vështirë për skenën e kulturës, thotë Suzanne, duke përshkru që rrogat hala s’kanë dalë, shpenzimet për tre-katër netë të Vitit të Ri shprehet se na rrxojnë për toke, plus kohë fushate zgjedhjes politike dhe fushatë zgjedhjes bigbrothërore.
Por ajo nuk u lë pa rekomandime t’mira, tu ja nisë prej një përvjetori të randësishëm të Ismail Kadares në Gjirokastër. Orkestra e Filharmonisë nisë ciklin e koncerteve për 25-vjetorin e themelimit, me mysafirë flautistët Andrea Griminelli dhe Venera Mehmetagaj – Kajtazi.
Mundesh me e lexu edhe…
Qendra Multimedia sjell një lexim skenik në teatrin ODA me aktorët Flaka Haliti e Adrian Morina, ndërsa kino Lumbardhi ka program të veçantë filmash, ndërsa libraria Dukagjini organizon festivalin e librit BookFest.
Anej kufinit, në Tiranë ka ekspozitë retrospektive të Klement Zoraqit, e në Tropojë një festival pak ma i veçantë me flija e muzikë elektronike me mysafire Oda Halitin.
”Këto ditë ka dalë në shitje edhe një çift librash dedikum historisë së Prishtinës, ndërsa gjatë netëve të ftohta e pak të mërzitshme, jemi kënaq edhe me sezonin e ri të serialit televiziv ‘Queer Eye’ në Netflix”, thotë Suzanne.
Më poshtë sjell listën e gjërave të rekomanduara nga Suzanne Podcast për të bërë në këtë javë:
Me lexu e përkujtu: 89-vjetori i lindjes së Ismail Kadare, Muzeu Shtëpia Ismail Kadare, Gjirokastër
Vjet e humbëm shkrimtarin më të madh të letërsisë shqipe të kohnave moderne Ismail Kadaren, prandaj edhe po e veçojmë këtë ngjarje, përvjetorin e 89-të të lindjes së shkrimtarit, që do të pëcillet me një mori aktivitetesh në Gjirokastër në shtëpinë e tij të shëndrruar muze dhe në bibliotekën ‘Apostol Meksi’. Përgjatë 28 janarit do të ketë lexime, ekspozita, recitime, dedikuar gjigantit të letrave shqipe.
Me pa: Lexim skenik “Si mësova të ngas”, Teatri ODA, Prishtinë
“Si mësova të ngas” (Titulli origjinal: How I Learned to Drive) e Paula Vogel osht dramë fituse e çmimit Pulitzer në vitin 1998. Tema osht shumë e randë, ku shpaloset rrëfimi e Li’l Bit që u abuzu seksualisht nga burri i tezës, e gjithë kjo në ulësen e një Ford Mustang me abuzuesin e vet si instruktor të ngasjes. Qysh e përshkruan Qendra Multimedia si organizatore, shfaqja osht “egërsisht qesharake, befasuse dhe përfundimisht e trishtë, ku navigohen fushat e ndjeshme të traumës, shërimit, mbijetesës e fminisë së humbun. Kjo dramë nuk shtron pyetje thjesht për atë që ju ndodh viktimave të abuzimit — por për atë se qysh shoqnia bohët bashkëkryse në këtë krim.” Prezantimi skenik osht me 28 janar në ora 20:00 me aktorët Flaka Latifi & Adrian Morina.
Me dëgju: Koncert i Orkestrës së Filharmonisë së Kosovës, Pallati i Rinisë, Prishtinë
Orkestra e Filharmonisë së Kosovës, të premten më 31 janar 2025, vjen me një koncert të veçantë. Ylli italian i flautit Andrea Griminelli ka me ardhë në Prishtinë për këtë koncert nën drejtimin e mjeshtrit Dario Salvi. Me flautisten e mirënjohun kosovare Venera Mehmetagaj – Kajtazi, e interpretojnë kohën e tretë të Koncertit për dy flaute nga Cimarosa. Në këtë mbramje, në shënim të 255-vjetorit të lindjes së Beethoven-it, orkestra ka me interpretu edhe Simfoninë e 8-të të gjeniut klasik, ndërsa gjithashtu ka mu interpretu edhe premiera e veprës ‘Rush Hour 2’ nga kompozitori kosovar Lum Halabaku.
Me këqyr: Programi filmik “Kinemaja e zgjeruar”, Kino Lumbardhi, Prizren
Lumbardhi me 29 janar vazhdon me programin e filmave të Kinemasë së Zgjeruar, i titullum ‘Cut and Banned: Kinemaja e Censuruar – me fokus në filma të ndryshëm që janë ndalu për arsye të prishjes apo cënimit të rendit social e politik në shtetet ku janë shfaqë. Filmi i të mërkures osht befasi për shikues, kështu që nëse jeni kah Prizreni, gjeni kohë dhe shkoni me këqyr film në Lumbardh. Pak si kinder-egg 3 in 1. , edhe befasi, edhe art, edhe pak rritje të vetëdijes.
Me lexu e me lujt: BookFest, Libraria Dukagjini, Albi Mall.
BookFest po rikthehet sërish në librarinë Dukagjini në Albi Mall me 31 janar e vazhdon deeeeri me 9 shkurt dhe organizatorët premtojnë që kësaj rradhe, festa do t’jetë më e madhe se kurrë me lexime librash, lojna për fëmijë, lirime deri 50% e plot aktivitete tjera.
Me hangër e me ngu: Festivali Milky Way
Edhe me hangër flija edhe me ngu muzikë elektronike s’na kish ra ndër mend me kombinu e leje mo me bo një festival dedikum kulturës së flisë me DJ Oda Halitin. Por Rruga e Qumështit, përgjatë lumit Valbona në rajonin e Tropojës po sjellë atmosferë festive, rustike, romantike, robotike, me 29 the 30 janar. Pjesëmarrësit kanë me mujt me ecë në “Rrugën e Qumështit”, tu vizitu stanet tradicionale të barijve e me përjetu jetën autentike malore. Ka edhe punëtori nga gratë për pregaditje flish dhe qashtu në mes natyrës së paprekun Oda ka me lëshu muzikë inspirume prej tingujve tradicionalë.
Shumë jemi të intrigum me këtë kombinim të natyrës së bukur, ushqimit të yndyrshëm dhe kcimit me tekno, ama diqysh edhe po lidhet.
Me pa: Retrospektivë e Klement Zoraqi, Galeria e Artit Tiranë
Galeria e Artit Tiranë po na fton në një udhëtim personal artistik: ekspozitën retrospektive e Klement Zoraqi. Artisti po i shënon 50 vite krijimtari të përmbledhuna në 50 punime, kryesisht portrete dhe peizazhe magjike që tregojnë historinë e tij që nga mosha 14-vjeçare deri sot. Sipas kuratorëve “përmes gjuhës së artit figurativ, Zoraqi krijon një lidhje intime me natyrën, duke sjellë në jetë harmoninë mes ndjenjës dhe mendimit, emocioneve dhe arsyes, qiellit dhe tokës.” Ekspozita çelet me 30 Janar në ora 18:00 dhe zgjatë deri me 18 Shkurt.
Me lexu: “Prishtina në histori – Vëllimi 1 & 2”
Osht një faqe instagrami ‘Prishtina në histori’ që ka plot rrëfime, detaje, shkrime, dëshmi nga periudhat ma të hershme të kryeqytetit kosovar. Materiali arkivor osht shumë i begatshëm, prej priftave të ndryshëm katolikë e deri te arkivat Otomane e deri te kohnat pak ma moderne, po tash krejt historia e qytetit pa lum që ka pas dy lumenj ka dal edhe në versionin e shtypun, që mundeni me gjetë në libraritë e qytetit. Materiali osht fascionues, dizajni i bukur edhe nëse doni me ditë do sende për Prishtinë, qysh osht jetu, e çfarë mahalla ka pasë e qysh osht zhvillu qyteti me ma së shumti pluhun (verës) e baltë (dimnit) në trojet shqiptare, lexoni këta dy libra.
Me këqyr: Sezoni 9 i “Queer Eye”, Netflix
S’di a ju ka ra me këqyr ‘Queer Eye’ ma herët, por ne në Suzanne jemi fansa të serialit që kombinon pak reality show ku kombinohen rregullimi i shpijave, këshilla psikologjike, pregaditje ushqimesh dhe stilim në bazë të personalitetit. Çdo episod, grupi Fab Five e përzgjedhin një mysafir me ja “ndreq jetën”, prej enterierit të shtëpisë e deri te këshilla qysh me pregaditë ushqim e qysh mu ndi super rahat e sexy kur veshën. Sezoni i nantë i “Queer Eye” prapë sjellë një aventurë emocionuse dhe transformuse për personazhet e tij. Fab Five, me stilin e tyne të veçantë dhe aftësitë vizëlluese e ngazëlluese, ndihmojnë individë që përballen me sfida të ndryshme, tu ju dhonë atyne entuziazmin dhe besimin për veten. Gati në çdo episod ka shumë përqafime, lotë të derdhun, dizajn fantastik dhe inspirim qysh me pru pak xixa në jetë. /Suzanne Podcast /Katror.info
Përgatiti:
