Artistja e vogël, që bën art për kauza humanitare

Është vetëm 9 vjeçe, por ka një zemër të madhe.

Artistja e vogël, Tara Alijaj, që në moshën 4-vjeçare, zbuloi pasionin e saj për pikturën. Me ndihmën e familjes, artin e saj filloi ta shesë, jo për përfitime personale, por për të mbështetur një shok për të trajtuar sëmundjen jashtë vendit. Ajo që filloi si një gjest miqësie lulëzoi në një mision për të lehtësuar vuajtjet e të tjerëve. Nisma e saj për shitjen e pikturave për bamirësi u përkrah edhe nga të tjerët.

“Jam Tara Alijaj, 9 vjeçe nga Prizreni. Unë fillova që t’i shisja pikturat e mia që në moshën 4 vjeçe sepse shoku im duhej të trajtohet në Turqi dhe terapitë e tij janë shumë të shtrenjta, sepse vuan nga ekzema dhe alergji të ndryshme, pastaj kam filluar t’i shesë pikturat për të tjerët që kanë pasur nevojë”, shprehet Tara.

Një ditë e rëndomtë e Tarës është e mbushur me aktivitete. Krahas shkollimit obligues ajo ndjek kursin e pikturës si dhe në të njëjtën kohë vijon mësimet edhe në shkollën e muzikës.  Ajo na shpërfaq talentin e saj që ka në piano.

Pavarësisht angazhimeve të shumta, Tarës nuk i mungon vullneti për punën me pikturat e saj për të grumbulluar para për bamirësi.

“Unë dy herë në javë ia kushtoj pikturës dhe unë shkoj në shkollë dhe kur vij shkoj në shkollë të muzikës dhe të artit… Unë ndihem e ngarkuar, por këto janë talentet e mia dhe i bëj me dëshirë… Mua më ka mbështetur nëna, ne kemi zgjedhur se kë të ndihmojmë së pari, pastaj i kemi shitur pikturat dhe i kemi dhuruar për ata që kanë nevojë”, thotë ajo.

Nderkaq, gjatë kohës sa ne intervistuam Taren, në një vend të përzgjedhur nga familja e saj, së bashku siguruam edhe një vend – ekspozitë për pikturat e saj, në mënyrë që sa më shumë njerëz të informohen për nismën e saj humanitare.

Tara nuk ua përcakton çmimin pikturave, të cilat mund të gjenden edhe në kafeterinë e frekuentuar të Prizrenit “Charm Caffe”. Shitjet e pikturave nuk ishin aq të lehta në fillim, por qëllimi i saj madhor bëri që ajo të ketë sukses. Çmimi më i lartë me të cilën është shitur njëra nga pikturat e saj është 550 euro, ndërsa Tara na përmend edhe disa detaje tjera.

“Ka qenë pak e vështirë, por tani është më e lehtë. Kam shitur mbi 50 piktura dhe nga to kam fituar mbi 4300 euro. Ata (prindërit e fëmijëve) janë ndjerë krenarë dhe me kanë përgëzuar… unë ndihem e lumtur kur i ndihmoj dikujt”, u shpreh Tara.

Ndërsa piktura e saj e preferuar u shit për rastin e fundit, të cilën ajo mbështeti me nismën e saj.

“Piktura ime më e preferuar që e kam shitur ka qenë për Ninën, sepse Ninës i nevojitej ndihma jonë dhe e kam shitur me dëshirë”, shtoi ajo.

Tara natyrisht se nuk ishte e vetme në këtë rrugëtim të veçantë. Ajo u mbështet nga familja e saj. Nëna e saj shpreson se qëllimi i mirë i Tarës të shihet si model e inspirim dhe të përqafohet edhe nga fëmijët e tjerë. Ajo thotë se prindërit duhet të ruajnë rolin e tyre qenësor për të rritur gjenerata të shëndosha që janë të dobishëm në shoqëri.

Ndërsa Tara frymëzohet për aktivizmin e saj të ëmbël me idenë që së bashku mund të ndryshojmë botën për të mirë.

“Jeta bëhet më e pasur kur e ndajmë me të tjerët, vetëm me një akt bamirës mund të ndryshojmë botën, kështu që njerëz të mirë dhuroni!”

Perveç humanizmit, Tara talentin e saj e perdor edhe si shenjë mirënjohje e falenderimi ndaj personave që bëjnë gjëra të mira për komunitetin dhe na bëjnë krenarë. Një pikturë ajo i kishte dhuruar në shenjë mirenjohje edhe alpinistës së mirenjohur shqiptare, Uta Ibrahimit.

Projekti i radhës i Tarës do të vazhdojë për të njëjtën kauzë, e për këtë ajo kërkon mbështetjen e të gjithëve.

“’Unë kam një projekt që do ta bëjë, ku do të ndihmojë fëmijët me leukemi dhe kancer, ku do të pikturoj veshje tradicionale… veshjet e Hasit, veshjet e Skorobishtës etj… Këto para shkojnë për fëmijët e prekur nga kanceri dhe leukemia, prandaj unë ju bëj thirrje të gjithë shqiptarëve për tu bashkëngjitur me këtë iniciative’’, përfundoi ajo.

Qytetarët e Kosovës shpesh herë kanë dëshmuar në praktikë fjalën humanizëm. Në vitin 2021 në kulmin e pandemisë Covid 19, Indeksi Botëror i Dhurimit e renditi Kosovën në vendin e nëntë nga mbi 140 vende për nga dhënia bamirëse e donacioneve financiare, vullnetarizmi ose ndihma domethënëse dhënë dikujt jashtë rrethit familjar. Tara është një shembull se si me vepra të vogla, por me zemërgjerësi të madhe, rritet ndërgjegjësimi mes njerëzve për të mbështetur ata që kanë nevojë. /Katror.info

Edicionin #38 të plotë e gjeni KËTU 🙂