Një sipërmarrës nga Tanzania ka gjetur një zgjidhje të zgjuar duke kthyer thasët e vjetër të çimentos në çanta shpine me panele diellore të integruara, që ndihmojnë fëmijët të kenë dritë për të lexuar gjatë natës.
Kjo nismë jo vetëm që ndihmon në pastrimin e mbetjeve, por gjithashtu përmirëson kushtet e të nxënit për fëmijët në zonat rurale. Projekti ka fituar mbështetjen e Programit të Kombeve të Bashkuara për Zhvillim (UNDP) për potencialin e tij në zgjidhjen e problemeve të komunitetit, shkruan Good News Network, përcjell Katror.info.
Kompania Soma Bags, e krijuar nga Innocent James, punëson 85 punëtorë nga zonat rurale për të përmbushur kërkesën për 13,000 çanta në muaj, edhe pse aktualisht nuk arrin ta plotësojë plotësisht këtë nevojë. James, i cili vjen nga rajoni Mwanza në veri të Tanzanisë, u frymëzua nga përvoja e tij personale, duke kujtuar se si dikur mësonte me ndihmën e një llampe me vajguri.
Mundesh me e lexu edhe…
Më shumë se 20 vite më vonë, shumë familje rurale ende përdorin këto llampa, të cilat janë të shtrenjta për t’u përdorur dhe të rrezikshme për fëmijët. Ideja e James erdhi pasi pa një profesor universiteti që kishte një panel diellor të qepur në xhaketën e tij për të karikuar telefonin. Kjo e inspiroi atë të krijonte çanta me panele të lira diellore, të cilat furnizojnë me energji një llambë për lexim.
James filloi të prodhonte çantat në vitin 2016, duke krijuar rreth 80 çanta në muaj dhe duke i shitur me çmime që variojnë nga 4 deri në 8 dollarë amerikanë. Kjo është e barazvlefshme me koston e përdorimit të një llampe me vajguri për rreth 15 ditë.
Përmes mbështetjes nga Programi i Inovacionit Funguo i UNDP, financuar nga Bashkimi Evropian dhe Qeveria e Mbretërisë së Bashkuar, Soma Bags ka sjellë një ndikim të madh. Çantat jo vetëm që kanë përmirësuar performancën akademike të fëmijëve duke siguruar dritë të besueshme për të studiuar natën, por kanë ndihmuar edhe në ruajtjen e mjedisit, duke ripërdorur deri në 200,000 thasë çimentoje çdo muaj.
“Ka një brez të ri të të rinjve në Tanzani që po e marrin të ardhmen në duart e tyre,” tha Joseph Manirakiza nga UNDP. “Innocent përfaqëson një grup të rinjsh që po përdorin talentin e tyre për të bërë diçka me kuptim”, tha ai tutje. /Katror.info
Përgatiti:
