“Trembelat”, një grup i dizajnerëve, programerëve dhe aktivistëve, kanë botuar së fundi dy librat e parë të serisë së projektit “Prishtina në histori”.
Të botuar me siglën “Varg” (Varg Trembelat), dy vëllimet e para të “Trembelave” shpalosin të dhëna mjaft të rëndësishme për historinë e kryeqytetit, nga mesjeta deri në prag të Luftës së I-rë botërore, shkruan Kallxo.com.
Përmes një njoftimi, “Trembelat” ka bërë të ditur se vëllimi i parë përmban 101 dokumente dhe fragmente që përmendin Prishtinën nga viti 1315 deri në vitin 1912, duke ofruar një pasqyrë të pasur të periudhave të ndryshme historike.
Mundesh me e lexu edhe…
Kurse, po sipas njoftimit, vëllimi i dytë përfshin tekste autoriale nga studiues të ndryshëm, që trajtojnë tema si origjina e qytetit, periudha osmane, dinastët e familjes Gjinolli dhe çështje të tjera të rëndësishme për historinë e Prishtinës.
Botimi i dy vëllimeve, “Prishtina në histori”, vjen pas suksesit përmes platformës digjitale “Prishtina në histori”, ku materialet dhe artikuj janë botuar në tri gjuhë të ndryshme, librat e shtypur janë plotësuar edhe me materiale shtesë.
“Në mesin e tyre është një artikull krejt i ri për familjen Gjinolli, i përditësuar sipas dokumenteve arkivore, pastaj një fragment nga hrisobula e Graçanicës nga viti 1321, pastaj dokumente të pabotuara nga fushata habsburge në Kosovë e vitit 1689, e të tjera” – thuhet në njoftimin e datës 10.02.2025.
Librat, ka thënë Yll Rugova, redaktori i botimeve dhe i platformës digjitale “Prishtina në histori”, përveç tekstit, kanë edhe shumë ilustrime e grafika, një pjesë e tyre të dizajnuara enkas për botimin e shtypur.
“Synimi jonë është të bëjmë sa më të njohur dhe të prekshme historinë e hershme të Prishtinës. Duke sjellë drejtpërdrejtë dokumentet arkivore, e duke përdorur grafika e ilustrime, ‘Prishtina në histori’ si projekt nuk mëton vetëm publikun e specializuar të studiuesve, por secilin qytetar që mund të ketë interesim, ose që mund të zhvillojë interesim në historinë e qytetit”- ka thënë Rugova.
Rugova ka thënë se, dy librave të botuara, së shpejti pritet edhe një vëllim i tretë që përfshinë dhjetë letra nga Anton Vas, nënkonsulli francez i Prishtinës në vitin 1812.
“Përvoja e tij e shkurtër në Prishtinë është shumë interesante, dhe besoj do të jetë me interes edhe për lexuesit” – ka shtuar Rugova.
Të dy vëllimet janë të disponueshme në libraritë “Dukagjini Bookstore”, Libraria “Buzuku” dhe Libraria “Artini” (Toena). Libra mund të gjenden edhe në në pika si “MIQT Pub” ose të porositen online. Po ashtu, librat mund të blihen online përmes platformës së Librarisë “Dukagjini”.
Projekti i botimit është mbështetur nga Ministria e Kulturës, Rinisë dhe Sportit përmes programit të saj për mbështetjen e botuesve.
Autorë dhe bashkëpunëtorë të përfshirë në botim janë studiesit: Agron Islami, Durim Abdullahu, Lekë Shala, Kaltrina Igrishta dhe Rinë Zhitia.
Platformës “Prishtina në histori” nisi publikimet në viti 2024, duke përmbledhur një grumbull digjital të teksteve, hartave, gravurave, fotografive dhe punimeve rreth historisë së qytetit të Prishtinës, që kapin kohën prej fundit të shekullit 13-të deri në vitet e para të shekullit 20-të. /Kallxo.com /Katror.info
Përgatiti:
