Shumë ish-bashkëlojtarë, miq dhe dashamirë të legjendës Fadil Vokrri u mblodhën të mërkurën në Kampin Nacional të FFK-së në Hajvali për të nderuar jetën dhe veprën e tij të jashtëzakonshme.
Edhe këtë vit me rastin e ditëlindjes së Legjendës u organizua turneu “Fadil Vokrri”, nën përkujdesjen e Ligës së Veteranëve të Futbollit të Kosovës dhe me mbështetjen e Federatës së Futbollit të Kosovës (FFK).
Sipas njoftimit të FFK, edhe sivjet ky aktivitet përkujtimor mblodhi bashkë veteranët e Prishtinës dhe Llapit, dy klubet ku Vokrri la gjurmë të pashlyeshme, si dhe veteranët e Kosovës dhe ata të Gostivarit, që luajtën ndeshjen për trofeun e këtij turneu, raporton Katror.info.
Mundesh me e lexu edhe…
I pranishëm ishte edhe presidenti i FFK-së, Agim Ademi, së bashku me emra të njohur të futbollit si Ajet Shosholli, Muharrem Sahiti, Jusuf Tortoshi, Ramiz Krasniqi, Isa Sadriu dhe shumë të tjerë.
“Në ndeshjen kryesore të ditës, ekipi i veteranëve të Kosovës triumfoi ndaj veteranëve të Gostivarit, me rezultat 5:3, në një duel të luftuar, por të mbushur me respekt. Në nderim të legjendës, në minutën e 9-të ndeshja u ndal për 1 minutë dhe zurën vend duartrokitjet e të gjithë të pranishmëve. Dy gola për Kosovën i shënoi Fisnik Ademi, derisa nga një gol e realizuan Blerim Haxholli, Denis Isaja dhe Xhavit Mehmeti. Ndërkaq, për Gostivarin dy gola i realizoi Ergjan Menga, kurse një gol Bekim Ahmeti,” thuhet në njoftim.
Paraprakisht, veteranët e Prishtinës realizuan fitore me një përmbysje të rezultatit në duel me veteranët e Llapit, 3:2. Ndonëse këta të fundit kaluan në epërsi 2:0 me dy gola të Rrahim Kaçanollit, prishtinasit reaguan fuqishëm dhe fituan me rezultat 3:2, falë ‘hat-trick’-ut të Sheremet Isufit, i cili shkëlqeu si në ditët e tij më të mira, duke dëshmuar se klasi nuk vjetrohet.
Në fund mirënjohjet për ekipet pjesëmarrëse i ndau Ramiz Krasniqi, derisa trofeun ‘Fadil Vokrri’ për kapitenin e veteranëve të Kosovës, Hysni Gjinovci e ndau trajneri legjendar, Ajet Shosholli./Katror.info
