Klubi i Astronomëve të Kosovës ka bërë thirrje për të gjithë të interesuarit që të shkojnë dhe të vizitojnë Observatorin e Prishtinës për të parë Hënën dhe Jupiterin gjatë periudhës 22-31 janar.
Në një event të krijuar nga profile zyrtar i këtij klubi, shihet se deri më tani ka rreth 300 të interesuar për të marrë pjesë në një ngjarje të tillë, raporton Katror.info
“Nuk ka nevojë për rezervime! Thjesht shfaquni dhe zhytuni në bukurinë e qiellit të natës. Astronomët dhe ekipa e klubit të astronomisë do të jenë gati për t’ju udhëhequr në një përvojë të paharrueshme të vëzhgimit të yjeve”, kanë shkruar nga ky klub në rrjetin social Facebook.
Mundesh me e lexu edhe…
Nga ky klub po ashtu lajmëruan që të interesuarit të vënë re edhe motin, pasi sipas tyre nëse moti nuk është i përshtatshëm nuk mund të bëhet vëzhgimi i këtyre trupave qiellor.
“Ju lutemi vini re se vëzhgimet tona me teleskopë janë subjekt i kushteve të motit. Nëse moti nuk bashkëpunon, ne nuk do të mund të përdorim teleskopin”, u tha më tutje në njoftim.
Sipas të dhënave në uebfaqen e Manifesta 14 e cila në vitin 2022 u mbajt në Prishtinë thuhet se Observatori i Prishtinës bën pjesë në kuadër të objekteve të Pallatit të Rinisë dhe kjo ndërtesë u hap në fund të viteve ‘70 për hulumtues të rinj dhe kërkues shkencorë duke sjellë kësisoj një periudhë të re për komunitetin shkencor në Kosovë. Po ashtu thuhet se Observatori nuk ka qenë në përdorim për dekada, por kjo hapësirë është rikthyer tanimë nga Klubi Astronomik i Kosovës. Prej vitit 2014, ky klub punoi në revitalizimin dhe në pajisjen e kësaj ndërtese me teleskopë, për ta bërë të gatshme për t’u rihapur prap për të parë yjet./Katror.info
Përgatiti:
