Pas përfundimit të javës së 35-të në Superligën e Zvicrës, FC Basel 1893 është shpallur zyrtarisht kampion për sezonin 2024/25 – një rikthim triumfal pas tetë vitesh pa titull, shkruan Katror.info.
Në qendër të këtij suksesi qëndron emri i madh i futbollit shqiptar, Xherdan Shaqiri, i cili ishte padyshim faktori kryesor në ringritjen e “Kuq e Kaltërve”.
Shaqiri, që u rikthye në Basel në fund të verës së kaluar, jo vetëm që kryeson listën e golashënuesve të kampionatit, por ka sjellë një energji të re në klub, duke frymëzuar një ekip që sezonin e kaluar luftonte për mbijetesë. Me lidershipin dhe formën e tij të jashtëzakonshme, ai ka qenë motori i një skuadre që u dallua për qëndrueshmëri dhe stil loje mbresëlënës.
Mundesh me e lexu edhe…
Faqja e klubit shkruan, “edhe pse mund të jetë e papërshtatshme të veçosh një lojtar të vetëm në një moment si ky, ia vlen të përmendet Xherdan Shaqiri. Jo vetëm për shkak të rolit të tij në fushë, si lideri i qartë i listës së golashënuesve të Superligës, por edhe sepse rikthimi i tij në fund të verës së kaluar shkaktoi një eufori që nuk ishte ndjerë në Basel për një kohë të gjatë. Shaqiri sigurisht luajti një rol kyç në fitimin e titullit, pasi performanca e tij brenda dhe jashtë fushës e bëri të gjithë ekipin më të fortë”.
❤️🏆 𝑺𝑪𝑯𝑾𝑬𝑰𝒁𝑬𝑹 𝑴𝑬𝑰𝑺𝑻𝑬𝑹 𝟐𝟎𝟐𝟒/𝟐𝟎𝟐𝟓 🏆💙#FCBasel1893 #AlliZämme #BrennefürdrFCB #rotblaulive pic.twitter.com/Rq1PQnpiVE— FC Basel 1893 (@FCBasel1893) May 11, 2025
Ky është titulli i 21-të në historinë e klubit dhe përveç Shaqirit, në këtë sukses kanë kontribuar edhe emra të tjerë shqiptarë si Taulant Xhaka, Albian Ajeti dhe Leon Avduallahu. Klubi e përshkroi Shaqirin si figurën kyçe jo vetëm në fushë, por edhe jashtë saj, duke i dhënë ekipit një identitet të ri dhe duke rikthyer pasionin në qytetin e Basel-it.
Për FC Basel-in dhe tifozët e tij, ky është një rikthim i madh në fronin e futbollit zviceran – dhe mbi të gjitha, është një rikthim që mban emrin Xherdan Shaqiri./Katror.info
