Nga një violinë e rrallë italiane e shekullit të 17-të e vjedhur në Japoni te Blackberry-i i humbur i Drake në Meksikë histori intriguese të instrumenteve të zhdukura dhe të rikthyera që rivalizojnë misterin e basit legjendar të Sir Paul McCartney-t.
Javën e kaluar, Sir Paul McCartney pati një ribashkim të veçantë me kitarën e tij bas, e cila ishte vjedhur në Londër 51 vjet më parë.
McCartney e kishte blerë këtë instrument në vitin 1961, por ai u grabit nga një furgon i grupit në vitin 1972. Falë projektit të kërkimit të basit të humbur, kitara u gjet pas dekadash, e fshehur në një tavan në Sussex.
Mundesh me e lexu edhe…
Si McCartney ashtu edhe prodhuesi i saj, Höfner, e konfirmuan autenticitetin e instrumentit, ndërsa një zëdhënës i muzikantit i tha BBC, se ai ishte ‘jashtëzakonisht mirënjohës’ për kthimin e instrumentit, transmeton Katror.info.
Por McCartney nuk është i vetmi muzikant që ka humbur një instrument të çmuar dhe as i vetmi anëtar i Beatles. Për shumë grupe, humbja e një instrumenti ose akoma më keq, e gjithë pajisjeve mund të jetë një katastrofë e vërtetë. BBC ka raportuar më parë për raste si ai i grupit rock Cemetery Sun, të cilëve iu vodhën të gjitha pajisjet, apo për Noisy, instrumentet e të cilëve u shfaqën në ankand online disa javë pas vjedhjes.
Grant Emerson, basi i grupit Delta Rae, kujton momentin kur humbi pajisje muzikore me vlerë rreth 10,000 dollarë (7,937 £): “Luajtëm në ‘Bitter End’ në New York dhe parkuam furgonin pak më tutje. Kur u kthyem, dera e pasme ishte thyer dhe të gjitha kitarat tona ishin zhdukur, bashkë me një pedal board dhe disa nga pajisjet e bateristit. Ishte një udhëtim tmerrësisht i keq për në Karolinën e Veriut.”
Ai shton se, për shumicën e grupeve, e vetmja zgjidhje është mbledhja e fondeve: “Thjesht mbështetesh tek fansat. Kërkon ndihmë dhe donacione, gjë që nuk është e lehtë.”
Për këtë arsye, ai këshillon muzikantët të fotografojnë numrat serialë të çdo instrumenti dhe pajisjeje që kanë.
Prej vitesh, instrumentet e humbura apo të vjedhura kanë bërë që muzikantët dhe fansat të nisin kërkime të ethshme për kitarat, violinat dhe madje edhe një bandë të tërë me instrumente të bronzta. Disa nga këto mistere muzikore mbeten ende të pazgjidhura.
BB King
Legjenda e muzikës blues, BB King, ishte i pandarë nga kitarat e tij Gibson, të cilat i quante Lucille. Gjatë karrierës, ai përdori disa versione të këtij instrumenti, por historia pas emrit lidhet me një ngjarje në vitin 1949, kur dëgjoi një grindje mes një çifti gruaja quhej Lucille.
Një nga kitarat e tij u vodh dhe përfundoi në një dyqan pengjesh në Las Vegas, ku u ble nga muzikanti Eric Dahl, i cili nuk e kuptoi se kishte në duar një nga kitarat e famshme të King. Kur mësoi të vërtetën, ai ia ktheu pa kërkuar asnjë kompensim.
Gibson-i u bë një nga instrumentet e fundit që King përdori para vdekjes së tij në 2015 dhe, më vonë, u shit për 280,000 dollarë në një ankand të pasurisë së tij në 2019.
Eric Clapton
Kitaristi legjendar Eric Clapton humbi Gibson Les Paul-in e tij ikonike, të njohur si Beano, menjëherë pas publikimit të albumit Blues Breakers with Eric Clapton në 1966.
Ndryshe nga BB King, ai nuk ka pasur fatin të ribashkohet me instrumentin e tij të paktën, ende jo. Kitaristi Joe Bonamassa ka pohuar se e di se ku ndodhet kitarën dhe në një intervistë të vitit 2016, ai deklaroi se ajo është në duart e një koleksionisti privat në SHBA. Në vitin 2018, fansat nisën një peticion për ta bërë koleksionistin të zbulojë më shumë detaje, por Beano mbetet ende një mister.
Takiko Omura
Një violinë e rrallë, e prodhuar në vitin 1675 nga mjeshtri italian Nicolo Amati, u vodh në vitin 2005 nga shtëpia e violinistes japoneze Takiko Omura, e cila e kishte blerë instrumentin dekada më parë në SHBA.
Me një vlerë prej pothuajse 377,895, në kohën e vjedhjes, violina mbeti e humbur për 15 vjet. Në vitin 2020, ajo u gjet gjatë një bastisjeje në Parma, Itali. Falë bashkëpunimit mes autoriteteve italiane dhe japoneze, instrumenti iu rikthye pronarit të ligjshëm.
Stooges Brass Band
Në vitin 2022, Stooges Brass Band, një nga grupet më të njohura të muzikës rrugore në New Orleans, humbi të gjitha instrumentet e saj vetëm dy javë para festivalit të madh Jazz Fest.
Banda, e cila kishte investuar 12,000 dollarë në pajisje përfshirë bateri, tastiera dhe amplifikatorë u përball me një goditje të rëndë pasi të gjitha u vodhën nga furgoni i tyre. Për fat të mirë, ata arritën të siguronin pajisje të reja dhe u rikthyen në skenë, duke mbajtur gjallë ritmin e New Orleans-it.
Drake
Për reperin Drake, një Blackberry dikur vlente po aq sa një instrument muzikor. Në këngën e tij të vitit 2009 Say What’s Real, ai përmend humbjen e disa nga tekstet e tij më të mira gjatë një udhëtimi në Meksikë: “Lost some of my hottest verses down in Cabo / So if you find a Blackberry with the side scroll…” Për të, ai telefon ishte arkivi i krijimtarisë së tij.
Edhe pse nuk u gjet kurrë, është e vështirë të besohet se Drake ende e kërkon me siguri, tashmë ka kaluar në teknologji më të re. /Katror.info
Përgatiti:
