Zyra e Bashkimit Evropian në Kosovë, e cila ka financuar renovimin e shkollës fillore “Dardania” në Prishtinë, ka organizuar sot një aktivitet me nxënësit e klasave të treta, duke vënë në fokus ruajtjen e ambientit.
“Diskutimet me nxënës kureshtarë dhe idetë brilante mbushën sot klasën në shkollën fillore “Dardania” në Prishtinë! Ambasadori Aivo Orav iu bashkua nxënësve të klasës së tretë për një sesion interaktiv mbi veprimet për ndryshimet klimatike, duke eksploruar mënyrat për të mbrojtur planetin tonë,” thuhet në njoftimin e Zyrës së BE-së në Kosovë.
“Me mbështetjen e BE-së për renovim të plotë, shkolla “Dardania” tani ofron një hapësirë të re dhe frymëzuese për mësim. Për të nxitur brezin e ri për ndryshim, seria e librave Mbrojtësit e planetit nga Europe House u dhurua për bibliotekën e shkollës, duke hapur rrugën për biseda të reja mbi qëndrueshmërinë, ” thuhet tutje në njoftim.
Mundesh me e lexu edhe…
Ambasadori i BE-së në Kosovë, Aivo Orav, theksoi rëndësinë e përkrahjes së Bashkimit Evropian për të ardhmen e vendit dhe përmirësimin e kushteve të mësimit.
“Jam shumë i lumtur që kjo shkollë është rinovuar falë ndihmës së BE-së. Edhe pse unë nuk e kam parë si ishte dy vite më parë, besoj se ndryshimi është i jashtëzakonshëm. Bashkimi Evropian është këtu për të ndihmuar jo vetëm edukimin tuaj, por edhe një mjedis më të pastër dhe më të qëndrueshëm,” u shpreh Orav, raporton KosovaPress.
Renovimi i shkollës “Dardania” është realizuar me një investim prej 1.68 milionë eurosh nga BE-ja. Përveç kësaj shkolle, si donatori më i madh në Kosovë, BE-ja po mbështet edhe rikonstruksionin e gjashtë shkollave të tjera në vende të ndryshme të Kosovës, me një fond prej mbi 6 milionë euro.
Ky investim jo vetëm që përmirëson infrastrukturën shkollore, por edhe krijon kushte më të mira për nxënësit dhe mësimdhënësit, duke u fokusuar njëkohësisht në çështje të rëndësishme si edukimi mjedisor. /Katror.info
Përgatiti:
