Një nga mesazhet që njerëzit e dëgjojnë shumë shpesh është se “stresi është i dëmshëm për shëndetin tuaj”. Por kjo gjendje ka një pikë, e cila përshkruhet “si niveli i duhur i stresit”, ka shkruar CNN.
Në këtë kontekst “sweet spot” apo niveli i duhur i stresit mund të përkthehet si “pika e ekuilibrit” ose “pika e duhur e stresit”. Pra, kur flitet për stresin, do të thotë që njerëzit duhet të gjejnë një nivel të stresit që është i mjaftueshëm për t’i shtyrë të arrijnë diçka dhe të performojnë mirë, por pa e tepruar, që të shkaktojë dëm.
Ekspertët kanë thënë se stresi mund të jetë i dëmshëm dhe të shkaktojë shumë probleme, veçanërisht kur bëhet kronik dhe i pandërprerë.
Mundesh me e lexu edhe…
Por, ndodhin disa raste kur stresi mund të sjellë mundësi rritjeje dhe, sipas një mjeku dhe autor i librit të ri “The Stress Paradox: Why You Need Stress to Live Longer, Healthier, and Happier” (Paradoksi i stresit: Pse keni nevojë për stres për të jetuar më gjatë, më shëndetshëm dhe më të lumtur), niveli i duhur i stresit mund të jetë madje thelbësor për mirëqenien tonë.
“Po, shumë stres na dëmton, por stresi jo i mjaftueshëm është po aq i dëmshëm”, ka thënë doktoresha Sharon Bergquist, mjeke dhe profesoreshë në Shkollën e Mjekësisë të Universitetit Emory në Atlanta, në një intervistë për CNN.
Ajo ka theksuar se stresi i “mirë” na ndihmon të rritemi dhe të lulëzojmë.
Çfarë e bën stresin “të mirë”?
Bergquist e ka përjetuar vetë stresin që nga fëmijëria, duke jetuar përmes Revolucionit Iranian dhe ka kaluar nëpër shumë vështirësi, por gjithashtu është një shembull i dikujt që ka arritur të ecë përpara përkundër tij.
“Unë e kam quajtur këtë stres të mirë dhe besoj se ky ka një ndikim të ndryshëm në trupin tonë krahasuar me stresin e keq”, ka thënë ajo.
Sipas saj, stresi i mirë mund të ju ndihmojë njerëzve të rrisin nivelet e kimikateve pozitive në trup, si dopamina, serotonina dhe oksitocina, që kontribuojnë në mirëqenien e përgjithshme.
Në anën tjetër, stresi i keq është i paparashikueshëm, i pashmangshëm dhe i vazhdueshëm. Kur dikush përballet me këtë lloj stresi, trupi lëshon kortizol, një hormon që mund të shkaktojë efekte negative si presion të lartë të gjakut dhe ndjenja të tjera të dëmshme.
“Stresi i mirë na ndihmon”, ka thënë Bergquist, duke shtuar se trupi ynë ka evoluar për të përballuar stresin si një pjesë të natyrshme të jetës.
Këto janë pesë këshilla për ta përdorur stresin në mënyrë të dobishme:
1. Gjeni “zonën e artë” të stresit
“Sfido veten të dalësh jashtë zonës së rehatisë pa u ndier i mbingarkuar. Stresi i mirë është si mjekimi. Dhe, si çdo mjekim, doza përcakton reagimin”, ka këshilluar Bergquist.
Pra, ajo shpjegon se stresi mund të ndihmojë nëse menaxhohet në sasinë e duhur.
2. Dëgjoni integritetin tuaj të brendshëm
“A po e sfidon veten në mënyra që përputhen me besimet që i ke? Stresi i mirë nuk është thjesht të mendoni pozitivisht për stresin tuaj, por të veproni në mënyrë të qëllimshme për të përballuar sfidat që kanë kuptim dhe që janë në përputhje me vlerat tuaja”, ka thënë tutje doktoresha.
3. Planifikoni kohë për rikuperim
“Për t’u rritur nga stresi duhet të bëni kohë për pushim dhe rikuperim”, ka thënë ajo. Rikuperimi është po aq i rëndësishëm sa dhe stresi i mirë, pasi ndihmon në rindërtimin e lidhjeve në trupin dhe trurin tuaj.
4. Përshtatni lidhjen ndërmjet mendjes dhe trupit
“Stresi fizik mund të ndihmojë në forcimin e qëndrueshmërisë mendore dhe anasjelltas”, ka thënë Bergquist. Aktivitetet si ushtrimet fizike, dieta e pasur me ushqime të pasura me përbërës që ndihmojnë në menaxhimin e stresit dhe ekspozimit të përkohshëm në temperatura ekstreme mund të jenë pjesë e një strategjie efektive.
5. Besoni se jeni krijuar për t’u përballur me stresin
“Përballja me stresin nuk është gabim, por një tipar i natyrshëm. Përmes cikleve të përsëritura të stresit dhe rikuperimit, ne ndihmojmë trupin të zhvillojë qëndrueshmëri dhe forcë”, ka thënë ndër të tjera doktoresha. /Katror.info
Përgatiti:
