Sot me fillim nga ora 17:00, nis “Prishtina Open 2024”, një nga ngjarjet më të mëdha sportive të vitit, e sidomos një ndër kryesoret për adhuruesit e pingpongut në Kosovë.
Ky eveniment pritet t’i mbledhë afro 300 pingpongistë nga mbi 20 shtete të ndryshme, duke tërhequr vëmendjen e sportistëve dhe tifozëve nga e gjithë bota.
Udhëheqësi dhe njëri ndër organizatorët e “Prishtina Open 2024”, Kastriot Orana, u shpreh i lumtur që këtë vit numri i sportistëve të interesuar për këtë ngjarje ka vazhduar të rritet.
“Në Pallatin e Rinisë, në Prishtinë, do të mbahet turniri i dytë i ‘Prishtina Open’, ku për dallim prej vitit të kaluar kemi masovitet edhe më të madh, ka pjesëmarrje prej 20 shteteve, edhe do të garojnë afro 300 lojtarë/e nga kategori të ndryshme”, u shpreh Orana.
Ndërkaq ai po ashtu shpalosi se turniri “Prishtina Open 2024” do të fillojë sot, me kategorinë e veteranëve.
“Do të mbahen kateogritë e veteranëve, sot, prej orës 17:00 fillojnë, e kjo do të ndahet në 5 nënkategori. Nesër do të luajnë U-17 dhe U-21, ndërsa të dielen në mëngjes do të fillojnë U-13, ndërsa pasdite do të luajnë ndeshjet kryesore të seniorëve”, shtoi tutje Orana.
“Prishtina Open 2024”, këtë vit organizohet në kuadër të manifestimeve për nder të Ditës së Çlirimit të Prishtinës, ndërkaq, po ashtu, kjo ngjarje sportive është pjesë e ngjarjeve që organizohen nën kuadrin e organizmeve dhe aktiviteteve për nder të shpalljes së Prishtinës si “Qytet Evropian i Sporteve”.
Ndërkaq, i lumtur për organizmin e suksesshëm të ‘Prishtina Open 2024’, u shpreh edhe Bardh Krasniqi, nga Drejtoria e Sportit e Komunës së Prishtinës.
“Prishtina Open 2024′ është një prej ngjarjeve më të mëdha sportive në vend, edhe kjo është njëra ndër arsyet kryesore pse jemi mbledh bashkë sot në Kryeqytetin Evropian të Sportit. Prishtina do të kumbojë me sport, rini, kulturë dhe aktivitete të ndryshme, e kjo falë jush, si klube, si federata dhe si OJQ. E ne si komunë, synim të vetëm e kemi që bashkë me juve të jemi një platformë zhvilluese për të rinjt dhe të rejat e kryeqytetit, e të cilëve pastaj po ua shohim frytet rinisë në arenën ndërkombëtare”, u shpreh Krasniqi.
Ndërkaq Orana u shpreh se përmes sportit të pingpongut, si klub dhe si organizatorë të këtij turniri, po tentojnë të bëjnë edhe pak “Ping-pong diplomacy”.
“Përmes sportit të pingpongut po mundohemi që të bëjmë pak ‘pingpong diplomacy’, dhe këtë vit kemi lojtarë prej klubeve, prej shteteve që nuk e kanë njohur pavarësinë e Kosovës, kështu që kjo po na bon me u ndi edhe më mirë që përmes sportit, po mundohem me ndërtu ura të bashkëpunimit me klube, me qytete, me shtete, të cilat nuk janë ende shumë miqësor ndaj Kosovës”, u shpreh Orana.
Edhe këtë vit, turneu do të zhvillohet në Pallatin e Rinisë dhe do të përfshijë kategori të ndryshme, duke filluar nga juniorët U13 e deri te veteranet mbi moshen 70 vjecare.
Ky turnir në përgjithësi po shihet si mundësi për të gjithë sportistët t’i shfaqin aftësitë e tyre sportive, dhe të krijojnë lidhje të reja bashkëpunuese për ta reprezentuar vendin e tyre në skenën ndërkombëtare./Katror.info