Ministria e Financave, Punës dhe Transfereve ka bërë nënshkrimin e marrëveshjes në vlerë prej 12.6 milionë eurosh me Bankën Gjermane për Zhvillim (KfW).Ky projekt është kontribut i Bashkimit Evropian i implementuar nga KfW.
Ministri Hekuran Murati, tha se projekti synon të mbrojë shëndetin publik dhe gjithashtu do të kontribuojë në mbrojtjen e ambientit.
“Ka për synim përmirësimin e cilësisë së jetës së qytetarëve tanë përmes garantimit të një mjedisi më të pastër që ndikon në përmirësimin e shëndetit publik. Marrëveshja do të mundësojë ofrimin e infrastrukturës për menaxhimin e mbeturinave në Prishtinë, Prizren dhe Gjilan, e që është pjesë e programit më të gjerë për menaxhimin e mbetjeve të forta faza dy deri në fazën katër që menaxhohet nga KfW me mbështetjen e BE-së”, tha Murati.
Kurse Klaus Muller, shef për Evropën Juglindore në KfW, tha se menaxhimi i mbeturinave në Kosovë është një problem i madh dhe se është më rëndësi që të punohet më me përkushtim në nivelin lokal dhe atë qendror.
“Gjermania i ka alokuar 20 milionë euro për këtë projekt më herët dhe tani kemi një fond të ri IPA të BE-së. Të gjithë e dimë që problemet janë shumë prezente dhe se sa është urgjente që të merren veprime sidomos në Prishtinë ku kemi deponinë në Mirash e cila është në kolaps dhe shkakton shumë rreziqe për mjedisin sepse emitimi i gazrave është shumë i lartë. Është me rëndësi që të veprohet menjëherë”, tha Muller.
Ndërkaq, Dardan Veliaj kryeshef ekzekutiv në Ndërrmarjen për Menaxhimin e Deponive në Kosovë, tha se me këtë projekt gjendja e deponive sanitare në vend pritet të ndryshojë.
“Kemi pasur një keqmenaxhim të gjatë të këtij sektori, kemi pasur mungesë të planifikimit adekuat, mungesë të investimeve adekuate gjë që ka sjell dëme të mëdha në ambient”, ka thënë Veliaj./Katror.info
Përgatiti:
